سکر (بيورو رپورٽ): سکر ۾ لينس ڊائون پل تي آتش بازي دوران پيش آيل افسوسناڪ حادثي ۾ ٽي ماڻهو سڙهي زخمي ٿي پيا. واقعو ان وقت پيش آيو جڏهن آتش بازي سبب احتياطي تدبيرن طور پل کي ٽريفڪ ۽ عام شهرين لاءِ بند ڪيو ويو هو، پر پيادل آمدرفت دوران ٽي ڄڻا آتش بازي جي زد ۾ اچي ويا.
عين شاهدن موجب آتش بازي دوران اوچتو شعلن ۽ چنگارين جي ويجهو اچڻ سبب پل تان پيادل گذرندڙ ٽي ماڻهو سڙهي زخمي ٿي پيا، جن کي فوري طور ريسڪيو ڪري سول اسپتال سکر منتقل ڪيو ويو، جتي کين ابتدائي طبي امداد فراهم ڪئي وئي.
واقعي جي اطلاع ملندي ئي ڊپٽي ڪمشنر سکر نادر شهزاد ۽ فوڪل پرسن عرفان داود پوٽو سول اسپتال پهتا ۽ زخمين جي عيادت ڪندي سندن خيريت معلوم ڪئي. ان موقعي تي هنن ڊاڪٽرن کي متاثر ماڻهن کي بهترين علاج مهيا ڪرڻ جون هدايتون پڻ جاري ڪيون.
ان کان پوءِ صوبائي وزير بلديات جي خصوصي ٽيم به اسپتال پهچي زخمين سان ملاقات ڪئي ۽ علاج معالجي جي صورتحال جو جائزو ورتو. طبي ماهرن جي صلاح سان زخمين کي وڌيڪ بهتر علاج لاءِ ريسڪيو 1122 جي خصوصي ايمبولينس ذريعي گمز (GIMS) اسپتال منتقل ڪيو ويو.
انتظاميه موجب واقعي جي جاچ جاري آهي، جڏهن ته مستقبل ۾ اهڙن واقعن کان بچاءَ لاءِ حفاظتي قدم وڌيڪ سخت ڪرڻ جو فيصلو ڪيو ويو آهي. انتظاميه شهرين کان اپيل ڪئي آهي ته آتش بازي ۽ عوامي تقريبن دوران جاري ڪيل حفاظتي هدايتن تي سختي سان عمل ڪن ته جيئن ڪنهن به ناخوشگوار واقعي کان بچي سگهجي.
