تفصيلن مطابق، جمعيت علماء اسلام ضلع سکر جي مجلسِ عاملہ ۽ تحصيلن جي امراء ۽ نظامي عام صاحبان جو گڏيل ۽ اهم اجلاس جامعہ اسلامیہ اشاعت القرآن حماديہ پيارو واھ، روهڙي ۾ منعقد ٿيو. اجلاس جي صدارت جمعيت علماء اسلام ضلع سکر جي امير حضرت مولانا محمد صالح انڌڙ ڪئي، جڏهن ته اجلاس جي ڪارروائي جمعيت علماء اسلام ضلع سکر جي سيڪريٽري جنرل حافظ عبدالحميد مهر انجام ڏني، جن اجلاس جي شرڪت ڪندڙن اڳيان تنظيمي ايجنڊا پيش ڪيو ۽ ضلع ۾ تنظيمي صورتحال، موجوده حالتن ۽ مستقبل لاءِ لائحہ عمل تي تفصيلي روشني وڌي.
جمعيت علماء اسلام ضلع سکر جي ترجمان مولانا امان الله سکروي جي جاري ڪيل بيان موجب، اجلاس ۾ متفقه طور تي هي اهم فيصلو ڪيو ويو ته جمعيت علماء اسلام ضلع سکر جي ماتحت ڪارڪنن جي فڪري، تنظيمي ۽ دعوتي تربيت کي مؤثر بڻائڻ لاءِ 4 ۽ 5 فيبروري 2026ع تي ٻه ڏينهن جو تربيت وارو ڪنوينشن منعقد ڪيو ويندو، جنهن جي تيارين جو آغاز فوري طور ڪرڻ جي هدايت ڏني وئي.
اجلاس ۾ مفتِي شفيع محمد هاليجوي، مولانا غلام الله هاليجوي، مولانا عبد الكريم عباسي، مولانا زبير احمد مهر، حافظ غلام مصطفى برڙو، مولانا غلام علي ڊيپر، مفتي ذبيح الله جتوئي، مولانا رفيق حمد ميراني، قاري عبدالغفار سومرو، مولانا سيف الله سمائر، حافظ ابو اسامه عباسي، فرزان علي فهنوار ۽ ٻين شرڪتدارن شرڪت ڪئي.
شرڪتدارن اجلاس ۾ سکر شهر ۾ وڌندڙ اڻڄاتل صورتحال، لاقانونيت، چوري ۽ ڊڪيتين جا واقعا ۽ عوامي بيچيني تي گهري تشويش ظاهر ڪئي. انهيءَ موقعي تي فيصلو ڪيو ويو ته جمعيت علماء اسلام ضلع سکر امن ۽ امان جي بحالي لاءِ سکر جي مختلف علائقن ۾ ڀرپور عوامي ۽ تنظيمي تحريڪ شروع ڪندي، جنهن جو تفصيلي شيڊول جلد جاري ڪيو ويندو.
وڌيڪ اهو به طئي ڪيو ويو ته منگل کان ضلع جي سڀني تحصيلن جو تنظيمي دورو شروع ڪيو ويندو، جنهن دوران تحصيل سطح تي تنظيمي رڪارڊ، فعاليت ۽ ڪارڪردگي جو جائزو ورتو ويندو ته جيئن تنظيم کي وڌيڪ فعال، منظم ۽ مؤثر بڻائي سگهجي.
اجلاس جي اختتام تي ملڪ ۽ ملت، امن ۽ امان ۽ تنظيم جي ڪاميابي لاءِ خاص دعا ڪئي وئي.
