استنبول: وزيراعظم شهباز شريف ترڪي جي دوري دوران ترڪ سيڙپڪارن ۽ ڪاروباري اڳواڻن سان اهم ملاقاتون ڪيون، جن ۾ پاڪستان ۽ ترڪي وچ ۾ اقتصادي ۽ واپاري لاڳاپن کي وڌيڪ مضبوط بڻائڻ ۽ گڏيل سيڙپڪاري کي هٿي ڏيڻ تي اتفاق ڪيو ويو. وزيراعظم ترڪ ڪمپنين کي پاڪستان ۾ وڌيڪ سيڙپڪاري جي دعوت ڏيندي مختلف اهم شعبن ۾ موجود ڪاروباري موقعن مان فائدو وٺڻ جي اپيل ڪئي.
وزيراعظم هائوس پاران جاري ڪيل بيان موجب، ملاقاتن دوران ٻنهي ملڪن وچ ۾ اقتصادي شراڪتداري کي نئين بلندين تائين پهچائڻ جي عزم جو اظهار ڪيو ويو. وزيراعظم شهباز شريف چيو ته پاڪستان ۽ ترڪي جا لاڳاپا تاريخي، ثقافتي ۽ ڀائپي جي بنيادن تي قائم آهن، جن کي هاڻي اقتصادي تعاون ذريعي وڌيڪ مستحڪم بڻائڻ جي ضرورت آهي.
هن ترڪ ڪمپنين کي پاڪستان ۾ توانائي، معدنيات (کان کني)، انفارميشن ٽيڪنالاجي (آءِ ٽي)، انفراسٽرڪچر ۽ نجڪاري جي شعبن ۾ سيڙپڪاري ڪرڻ جي دعوت ڏني. وزيراعظم چيو ته پاڪستان وٽ قدرتي وسيلن، نوجوان افرادي قوت ۽ وڏي مارڪيٽ جي صورت ۾ بي شمار موقعا موجود آهن، جن مان ترڪ سيڙپڪار ڀرپور فائدو حاصل ڪري سگهن ٿا.
شهباز شريف زور ڀريو ته حڪومت پرڏيهي سيڙپڪاري جي واڌ لاءِ سازگار ۽ ڪاروبار دوست ماحول فراهم ڪرڻ لاءِ پرعزم آهي. هن چيو ته حڪومت اقتصادي سڌارن جو عمل جاري رکيو آهي، جنهن جو مقصد سيڙپڪارن جو اعتماد وڌائڻ، ڪاروباري ضابطن کي آسان بڻائڻ ۽ اقتصادي ترقي کي تيز ڪرڻ آهي.
ملاقاتن دوران ترڪ سيڙپڪارن پاڪستان ۾ پنهنجي ڪاروباري سرگرمين کي وڌيڪ وڌائڻ ۾ دلچسپي ظاهر ڪئي. هنن پاڪستان ۾ جاري اقتصادي سڌارن تي اعتماد جو اظهار ڪندي چيو ته ملڪ ۾ سيڙپڪاري لاءِ بهتر موقعا موجود آهن، خاص طور توانائي، تعميراتي منصوبن، آءِ ٽي ۽ ٻين ترقياتي شعبن ۾ گڏيل منصوبن تي ڪم ڪري سگهجي ٿو.
ترڪ واپاري اڳواڻن ٻنهي ملڪن جي حڪومتن جي سهڪار کي ساراهيندي چيو ته پاڪستان ۽ ترڪي وچ ۾ واپار ۽ سيڙپڪاري جي وڌيڪ گنجائش موجود آهي، جنهن مان فائدو وٺي ٻنهي ملڪن جي معيشتن کي وڌيڪ مضبوط بڻائي سگهجي ٿو.
وزيراعظم شهباز شريف ان موقعي تي ٻيهر يقين ڏياريو ته پاڪستان جي حڪومت سيڙپڪارن کي هر ممڪن سهولت فراهم ڪندي ۽ اهڙو ڪاروباري ماحول برقرار رکندي، جيڪو مقامي ۽ غير ملڪي ڪمپنين لاءِ هڪجهڙو سازگار هجي. هن چيو ته پاڪستان ۾ سيڙپڪاري ڪندڙ ڪمپنين جي تحفظ، شفاف پاليسين ۽ تيز رفتار سهولتن کي يقيني بڻائڻ حڪومت جي ترجيحن ۾ شامل آهي.
واضح رهي ته پاڪستان ۽ ترڪي وچ ۾ اقتصادي، واپاري ۽ دفاعي تعاون گذريل ڪجهه سالن دوران مسلسل وڌيو آهي، جڏهن ته ٻنهي ملڪن جي قيادت واپار جي مقدار ۾ اضافي، گڏيل منصوبن ۽ نئين سيڙپڪاري ذريعي لاڳاپن کي وڌيڪ هٿي ڏيڻ لاءِ سرگرم ڪردار ادا ڪري رهي آهي.
