ايران هن وقت ٻٽي بحرانن کي منهن ڏئي رهيو آهي، هڪ پاسي وڌندڙ اندروني بيچيني ۽ ٻي پاسي ٻاهرين فوجي خطرن جو دٻاءُ موجود آهي. اهڙي صورتحال ۾ مغربي ميڊيا آيت الله علي خامنه اي جي متبادل خفيه منصوبي بابت انڪشاف ڪيو آهي۔
ايران ۾ هڪ طرف حڪومت مخالف احتجاج وڌي رهيا آهن، جڏهن ته ٻي طرف آمريڪا ۽ اسرائيل طرفان ممڪن فوجي ڪارروائي جو خطرو به منڊلايو پيو وڃي۔
ان پسمنظر ۾ برطانوي ميڊيا انٽيليجنس رپورٽ جي حوالي سان خبر ڏني آهي ته بدترين صورتحال جي صورت ۾ آيت الله علي خامنه اي ماسڪو وڃڻ جو پلان بي تيار ڪري رکيو آهي۔
رپورٽ موجب جيڪڏهن سيڪيورٽي فورسز احتجاج تي ضابطو آڻڻ ۾ ناڪام ٿيون يا وفاداري ڇڏي ڏين، ته خامنه اي پنهنجي ويجهي حلقو، خاندان ۽ پٽ مجتبيٰ خامنه اي سميت ايران ڇڏي سگهي ٿو۔ ان مقصد لاءِ هن تهران مان نڪرڻ جا ممڪن رستا اڳ ئي منصوبا بندي هيٺ آندا آهن، ۽ محفوظ انخلا لاءِ ٻاهرين ملڪن ۾ جائيدادون، اثاثا ۽ نقد رقم پڻ گڏ ڪئي پئي وڃي۔
ايراني عملدارن جو چوڻ آهي ته خراب معيشت، مهانگائي، ڪرنسي جي قدر ۾ شديد گهٽتائي، آمريڪي پابنديون، بدعنواني ۽ بدانتظامي عوامي غصي کي وڌيڪ ڀڙڪائي ڇڏيو آهي۔ اهڙين حالتن ۾ سيڪيورٽي فورسز به معاشي دٻاءُ جو شڪار آهن۔
آمريڪي صدر ڊونلڊ ٽرمپ طرفان ايراني مظاهرين جي حمايت ۽ فوجي مداخلت جون ڌمڪيون ڏنيون ويون آهن، جڏهن ته اسرائيلي عملدارن جا بيان صورتحال کي وڌيڪ پيچيده بڻائي رهيا آهن۔
ايراني تجزيه نگارن موجب وينزويلا ۽ شام جون مثالون ايراني قيادت لاءِ خطري جي گهنٽي آهن، جتي معاشي بدحالي رياستي ڍانچي کي ڪمزور ڪري ڇڏيو۔
اهڙي صورتحال ۾ آيت الله علي خامنه اي جو سخت بيانيو ۽ مظاهرين کي شرپسند قرار ڏيڻ حالتن کي وڌيڪ خراب ڪري سگهي ٿو۔
ماهرن جي راءِ آهي ته حڪومت وٽ نه ته بگڙندڙ معيشت کي سنڀالڻ لاءِ ڪا واضح حڪمتِ عملي موجود آهي ۽ نه ئي ايٽمي پروگرام تي اهڙن سمجهوتن جا آثار نظر اچن ٿا، جيڪي آمريڪا ۽ اسرائيل کي مطمئن ڪري سگهن۔
