چيئرمين پاڪستان پيپلز پارٽي بلاول ڀٽو زرداري چيو آهي ته اسپتالن جو قيام هجي يا تعليمي نظام ۾ بهتري، سنڌ حڪومت هر شعبي جي بهتري لاءِ ڪم ڪري رهي آهي، ۽ صوبائي حڪومت جي ڪوششن کي عالمي سطح تي به تسليم ڪيو پيو وڃي۔
اسلام آباد ۾ هڪ تقريب کي خطاب ڪندي بلاول ڀٽو زرداري چيو ته سنڌ حڪومت صحت جي شعبي ۾ سڌارن تي خاص ڌيان ڏئي رهي آهي۔ سڄي سنڌ ۾ صحت جي نظام کي مضبوط بڻائڻ لاءِ قدم کنيا ويا آهن۔ سنڌ ۾ عالمي معيار جون صحت جون سهولتون مفت فراهم ڪيون پيون وڃن۔ جناح اسپتال کي عالمي معيار جو بڻايو ويو آهي، جڏهن ته اين آءِ سي وي ڊي ۾ دل جي بيمارين جو علاج مفت ڪيو پيو وڃي۔
بلاول ڀٽو زرداري وڌيڪ چيو ته سنڌ ۾ اين آءِ سي وي ڊي جي نموني تي 11 اسپتال قائم ڪيا ويا آهن۔ سنڌ ۾ ڪينسر جو تمام مهانگو علاج به مفت ڪيو پيو وڃي، ۽ سنڌ ۾ پهريون ڀيرو ڪينسر جي علاج لاءِ سائبر نائيف ٽيڪنالاجي متعارف ڪرائي وئي آهي۔
هن چيو ته سنڌ ۾ يونيورسٽين جو انگ ٻيڻو ڪيو ويو آهي، صوبي ۾ غربت گهٽائڻ وارو پروگرام شروع ڪيو ويو آهي، ٻه لک سولر سسٽم پڻ ورهايا ويا آهن، ۽ سنڌ حڪومت جي ڪوششن سان ريونيون جي وصولي ۾ به بهتري آئي آهي۔
