ميئر سکر ارسلان اسلام شيخ طرفان سرسبز سکر مهم جو تسلسل جاري، اجرڪ جا ثقافتي رنگ به نمايان

ميئر سکر ارسلان اسلام شيخ طرفان سرسبز سکر مهم جو تسلسل جاري، اجرڪ جا ثقافتي رنگ به نمايان
ميئر سکر ارسلان اسلام شيخ جي قيادت هيٺ جاري سرسبز سکر مهم تحت اڄ گورنمينٽ بلوچ ماڊل اسڪول ۾ وڻڪاري مهم جو اهتمام ڪيو ويو، جتي ٽائون چيئرمين پنهنجي هٿن سان وڻ پوکي شهر کي صاف، سرسبز ۽ خوبصورت بڻائڻ جي عزم جو اعادو ڪيو۔
هن موقعي تي تقريب جا خاص مهمان جيئي شاهه ٽائون جا چيئرمين عزيزالله مغل هئا، جڏهن ته يو سي ون باپن شاهه جا چيئرمين بابن شاهه حضور بخش ميراني پڻ موجود هئا، جن شرڪت ڪندڙن جي همت افزائي ڪئي ۽ ماحول دوست قدمن جي اهميت تي زور ڏنو۔
تقريب ۾ ذاڪر حسين گڊاڻي، تحسين احمد ۽ غلام عباس گڊاڻي سميت ٻين ماڻهن به ڀرپور شرڪت ڪئي ۽ مهم کي ڪامياب بڻائڻ ۾ پنهنجو ڪردار ادا ڪيو۔ شرڪت ڪندڙن اسڪول ۽ ان جي آس پاس وڻ پوکي ماحول کي بهتر بڻائڻ ۾ حصو ورتو۔
ان موقعي تي مهمانن کي سنڌ جي ثقافت جي علامت اجرڪ پيش ڪئي وئي، جنهن سان تقريب کي ثقافتي رنگ پڻ مليو۔
ٽائون چيئرمين عزيزالله مغل چيو ته نوجوانن ۽ ٻارن ۾ وڻڪاري جو شعور پيدا ڪرڻ شهر جي ترقي لاءِ انتهائي ضروري آهي، جڏهن ته يو سي چيئرمين حضور بخش ميراني شهرين تي زور ڏنو ته هو وڌيڪ کان وڌيڪ وڻ پوکي سکر کي سرسبز بڻائڻ ۾ پنهنجو ڪردار ادا ڪن۔
تقريب جي پڄاڻي تي شرڪت ڪندڙن پوکيل وڻن سان گڏ يادگاري تصويرون پڻ ڪڍرايون ۽ هن عزم جو اظهار ڪيو ته هو سکر کي صاف، سرسبز ۽ خوبصورت رکڻ لاءِ پنهنجون ڪوششون جاري رکندا۔