پرڏيهي کاتي جي ترجمان طاهر حسين اندرابي مطابق، آمريڪي صدر ڊونلڊ ٽرمپ غزه لاءِ بورڊ آف پيس ۾ پاڪستان جي وزيراعظم شاهباز شريف کي شرڪت جي دعوت ڏني آهي.
ترجمان چيو ته پاڪستان کي غزه سان لاڳاپيل بورڊ آف پيس ۾ شامل ٿيڻ لاءِ باقاعده دعوت ملي آهي.
ترجمان جي مطابق، پاڪستان غزه ۾ امن ۽ سلامتي لاءِ عالمي ڪوششن ۾ سرگرم رهي ٿو، ۽ غزه ۾ پائيدار امن لاءِ پاڪستان بين الاقوامي برادري سان رابطا جاري رکندو.
طاهر حسين اندرابي چيو ته فلسطين جو مستقل حل گڏيل قومن جي قراردادن مطابق هجڻ گهرجي، ۽ پاڪستان وچ اوڀر ۾ دائمي امن لاءِ سفارتي ڪوششن جي حمايت جاري رکندو.
واضح رهي ته وائٽ هائوس ٽرمپ جي منصوبي تحت غزه بورڊ آف پيس جي ميمبرن جا نالا اعلان ڪيا هئا.
غزه ۾ ‘بورڊ آف پيس’ جو قيام ٽرمپ جي امن منصوبي جو حصو آهي، اهو بورڊ سيڪيورٽي، انساني امداد ۽ تعمير نو وارن منصوبن ۾ هم آهنگي کي يقيني بڻائيندو، گڏوگڏ فلسطيني اٿارٽي ۽ حڪومت ۾ سڌارن جو رستو به هموار ڪندو.
ٻئي طرف، اسرائيل غزه بورڊ جي تشڪيل کي رد ڪندي چيو آهي ته اهو بورڊ اسرائيلي حڪومت جي پاليسي جي خلاف آهي.
غير ملڪي ميڊيا مطابق، اسرائيلي وزيراعظم نيتن ياهو جي دفتر طرفان جاري بيان ۾ چيو ويو آهي ته هن بورڊ جي تشڪيل لاءِ اسرائيل سان رابطو نه ڪيو ويو.
بيان ۾ وڌيڪ چيو ويو آهي ته اسرائيلي پرڏيهي وزير گڊيئن سار غزه بورڊ جو معاملو آمريڪي وزيرخارجہ مارڪو روبيو سان اٿاريندا.
