ڀارتي سپر اسٽار اکشي ڪمار ۽ سندس گهرواري ٽوئنڪل کڻا ايئرپورٽ کان گهر موٽندي هڪ غير معمولي حادثي جو شڪار ٿي ويا۔
ڀارتي ميڊيا رپورٽن موجب، اکشي ڪمار ۽ ٽوئنڪل کڻا سومر جي شام پرڏيهه مان ممبئي واپس آيا ۽ گهر ويندي وقت سندن ڪار ۽ سيڪيورٽي گاڏي هڪ اوچتي حادثي ۾ ڦاسي وئي۔
رپورٽ موجب، هڪ تيز رفتار مرسڊيز جي ٽڪر سبب هڪ آٽو رکشا بي قابو ٿي پهريان اکشي ڪمار جي سيڪيورٽي قافلي سان ٽڪرايو ۽ پوءِ اداڪار جوڙي جي ڪار سان وڃي لڳو۔
ميڊيا رپورٽن موجب عيني شاهدن چيو ته حادثو ڏسي خوف محسوس ٿيو ۽ هر طرف افراتفري مچي وئي۔
حادثي سبب آٽو ڊرائيور ۽ سندس سواري ڪجهه دير لاءِ گاڏي هيٺ دٻجي ويا، جڏهن ته اکشي ڪمار ۽ سندس عملي فوري طور مدد فراهم ڪئي ۽ کين بحفاظت ٻاهر ڪڍيو ويو۔
رپورٽ موجب ممبئي جي جوهو علائقي جي ويجهو پيش آيل هن حادثي ۾ خوشقسمتي سان سڀئي ماڻهو محفوظ رهيا۔
ياد رهي ته اکشي ڪمار ۽ ٽوئنڪل کڻا پنهنجي شادي جي 25هين سالگرهه ملهائڻ لاءِ پرڏيهه ويا هئا، جتان واپسي دوران هي حادثو پيش آيو۔
