ڪراچي: پاڪستاني اداڪارا ڪنزا هاشمي چيو آهي ته کيس سندس اصل قابليت ۽ صلاحيت مطابق ساراهه نه ملي آهي ۽ هوءَ پاڻ کي “انڊر ريٽيڊ” (گهٽ مڃيل) سمجهي ٿي.
اداڪارا تازو هڪ انٽرويو دوران پنهنجي مختلف ڊرامن، اداڪاري ۽ فني سفر بابت ڳالهائيندي اهو اظهار ڪيو.
ميزبان جي هڪ سوال جي جواب ۾ ڪنزا هاشمي چيو ته کيس محسوس ٿئي ٿو ته سندس ڪم کي اها مڃتا نه ملي، جنهن جي هوءَ حقدار آهي.
هن چيو، “مون کي لڳي ٿو ته مون کي منهنجي اصل قدر ۽ قابليت مطابق ساراهيو نه ويو. مان هميشه مختلف نوعيت جا ڪردار چونڊيندي آهيان. ڊرامي ‘دل آويز’ ۾ مون ٻه مختلف ڪردار ادا ڪيا، ۽ ٻنهي ۾ منهنجي اداڪاري هڪ ٻئي کان بلڪل مختلف هئي.”
ڪنزا هاشمي وڌيڪ چيو ته هن ڪيترن ئي منصوبن تي ڪم ڪيو آهي، پر هاڻي سندس خيال آهي ته جيڪڏهن ڪنهن اداڪار جو هڪ ڊرامو ڪامياب ٿي وڃي ته ان کانپوءِ ٻيو ڊرامو به هٽ ٿيڻ ضروري هوندو آهي، تڏهن ئي کيس حقيقي اسٽار تسليم ڪيو ويندو آهي.
هن وڌيڪ چيو ته جيڪڏهن مسلسل ڪاميابيون نه ملن ته ماڻهو اڳوڻين ڪاميابين جو ڪريڊٽ به اداڪار کان کسي وٺندا آهن.
