پاڪستان ڪرڪيٽ ٽيم جي اڳوڻي ڪپتان شعيب ملڪ پاڪستان سپر ليگ (پي ايس ايل) مان رٽائرمينٽ جو اعلان ڪري ڇڏيو آهي۔
پنهنجي سوشل ميڊيا اڪائونٽ تي جاري ڪيل بيان ۾ شعيب ملڪ چيو ته پي ايس ايل ۾ 10 سالن جي ڪيريئر دوران ميدان اندر ۽ ٻاهر هر لمحي مان تمام گهڻو لطف اندوز ٿيو آهيان، هاڻي وقت اچي ويو آهي ته هن سفر کي هتي ختم ڪريان۔
شعيب ملڪ چيو ته ڪرڪيٽ جي بهتري لاءِ مستقبل ۾ به منهنجون خدمتون هميشه حاضر رهنديون۔
ياد رهي ته شعيب ملڪ 2015 ۾ ٽيسٽ ڪرڪيٽ ۽ 2019 ۾ ون ڊي ڪرڪيٽ مان رٽائرمينٽ جو اعلان ڪيو هو، جڏهن ته ٽي ٽوئنٽي انٽرنيشنل مان هن باقاعدي طور رٽائرمينٽ جو اعلان ناهي ڪيو، البت 44 ورهين جي آل رائونڊر 2021 کانپوءِ قومي ٽيم جي نمائندگي ناهي ڪئي، پر هو پي ايس ايل ۽ ٻين ٽي ٽوئنٽي ليگز ۾ کيڏندو رهيو آهي۔
شعيب ملڪ پي ايس ايل جا اڄ تائين سڀئي 10 سيزن کيڏي چڪو آهي۔ هن پي ايس ايل ۾ چار ٽيمون ـ ڪراچي ڪنگز، ملتان سلطانز، پشاور زلمي ۽ ڪوئٽا گليڊي ايٽرز ـ جي نمائندگي ڪئي۔ 2025 ۾ هن پنهنجو آخري سيزن ڪوئٽا گليڊي ايٽرز طرفان کيڏيو هو۔
