ڪراچي. (جمع: 27 مارچ 2026ع) گهريلو نااتفاقي کان تنگ شهري بجلي جي هاءِ ٽينشن پول تي چڙهي ويو، پوليس موجب گهريلو نااتفاقي سبب ابراهيم حيدري جي 100 ڪوارٽر واري علائقي ڀرسان هڪ حيرت انگيز واقعو پيش. آيو جنهن دوران هڪ شخص اوچتو بجلي جي هاءِ ٽينشن پول تي چڙهي ويو، جتي هن آپگهات ڪرڻ جي ڪوشش ڪئي پر ريسڪيو 1122 جي ٽيم موقعي تي پهچي وئي.
هاءِ ٽينشن پول جي اوچائي لڳ ڀڳ 100 کان 150 فٽ ٻڌائي پئي وڃي۔ واقعي جي اطلاع ملندي ئي ريسڪيو ٽيمون ۽ لاڳاپيل عملو فوري طور واقعي واري هنڌ تي پهچي ويو. ريسڪيو اختيارين موجب، هاءِ ٽينشن لائن تي چڙهندڙ شخص جي سڃاڻپ رحيم نالي سان ٿي آهي، جيڪو مبينا طور نشي جي حالت ۾ هو۔ ريسڪيو موجب شهري نشي واري حالت ۾ هو جنهن سبب هو بجلي جي خطرناڪ لائن تي چڙهي ويو، جنهن سان سندس حياتي کي سخت خطرو پيدا ٿي ويو.
ريسڪيو ٽيمن شهري کي محفوظ طريقي سان هيٺ آڻڻ لاءِ تياريون شروع ڪيون پر ان دوران شهري رحيم پاڻ ئي هيٺ لهي آيو، جنهن کان پوءِ اهلڪارن کيس پنهنجي حفاظتي طريقي سان هيٺ لاٿو، ريسڪيو ٽيم 1122 شهري رحيم کي وڌيڪ جاچ ۽ قانوني ڪارروائي لاءِ ٿاڻي منتقل ڪري ڇڏيو آهي،
