سکر: 31 مارچ 2026
رمضان المبارڪ جي مهيني دوران سنڌ حڪومت جي هدايتن تحت روينيو کاتي ۽ بيورو آف سپلاءِ سکر پاران قائم ڪيل رمضان (بچت) بازار ڪاميابي سان مڪمل ٿي وئي، جنهن ذريعي شهرين کي ضروري شين تي نمايان رليف فراهم ڪيو ويو۔
ان موقعي تي ڊپٽي ڪمشنر سکر Nadir Shehzad Khan آفيسرن ۽ عملي جي ڪارڪردگي کي ساراهيندي چيو ته رمضان المبارڪ دوران عوام کي مهانگائي کان بچائڻ ۽ کين سستي اگهن تي خوراڪ ۽ ٻين شين جي فراهمي يقيني بڻائڻ سندن اهم ذميواري هئي، جيڪا هنن ايمانداري ۽ محنت سان پوري ڪئي۔
هن وڌيڪ چيو ته سنڌ حڪومت ۽ ڪمشنر سکر ڊويزن جي واضح هدايتن تحت رمضان بچت بازار جو مقصد عام ماڻهو کي وڌ ۾ وڌ رليف فراهم ڪرڻ هو، جنهن ۾ ضلعي انتظاميا، روينيو کاتي ۽ بيورو آف سپلاءِ جي گڏيل ڪوششن اهم ڪردار ادا ڪيو۔
تقريب دوران ڊپٽي ڪمشنر سکر 15 کان وڌيڪ آفيسرن ۽ عملي ۾ تعريفي سرٽيفڪيٽ ورهايا، جن ۾ فهيم، شبير ميمڻ، وقار ابڙو (اناج منڊي)، عبدالسلام پيچوهو ۽ منير ٽانيو شامل هئا۔ انهن آفيسرن رمضان بازار جي بهتر انتظام، شفافيت ۽ عوامي سهولتن کي يقيني بڻائڻ ۾ نمايان خدمتون سرانجام ڏنيون۔
سرٽيفڪيٽ حاصل ڪندڙ آفيسرن ۽ عملي ان موقعي تي ڊپٽي ڪمشنر Nadir Shehzad Khan جو ٿورائتو اظهار ڪندي چيو ته هو مستقبل ۾ به عوامي خدمت جي جذبي سان پنهنجون ذميواريون نڀائيندا رهندا۔
ضلعي انتظاميا طرفان اهڙين قدمن کي جاري رکڻ جي عزم جو اظهار ڪيو ويو ته جيئن ايندڙ وقت ۾ به عوام کي وڌ کان وڌ سهولتون ۽ رليف فراهم ڪري سگهجي۔
