استنبول: پاڪستان جو وزيراعظم محمد شهباز شريف ترڪي جي صدر رجب طيب اردوان جي خاص دعوت تي ڇنڇر ڏينهن استنبول پهچندو، جتي ٻنهي اڳواڻن وچ ۾ ٻطرفن لاڳاپن جي مختلف شعبن بابت اعليٰ سطحي ڳالهيون ٿينديون.
هي ملاقات اهڙي وقت ٿي رهي آهي، جڏهن وچ اوڀر ۾ تيزي سان تبديل ٿيندڙ جاگرافيائي ۽ سياسي صورتحال، علائقي ۾ امن جي امڪانن ۽ عالمي سفارتي سرگرمين سبب ان کي خاص اهميت حاصل ٿي وئي آهي.
سفارتي ذريعن موجب وزيراعظم شهباز شريف ۽ صدر اردوان وچ ۾ دفاع، واپار، سيڙپڪاري، توانائي، انفارميشن ٽيڪنالاجي، صنعت، علائقائي رابطن ۽ اسٽريٽجڪ سهڪار سميت ٻطرفن لاڳاپن جي سمورن اهم شعبن جو تفصيلي جائزو ورتو ويندو.
ٻئي اڳواڻ گذريل سالن دوران قائم ٿيل اسٽريٽجڪ ڀائيواري کي وڌيڪ مضبوط بڻائڻ ۽ اقتصادي سهڪار کي نون بلندين تائين پهچائڻ بابت به صلاح مشورا ڪندا.
هي ملاقات اهڙي مرحلي تي پڻ ٿي رهي آهي، جڏهن ايندڙ هفتي انقره ۾ نيٽو جو اهم اجلاس ۽ يورپ سميت علائقائي سفارتي سرگرمين جي تناظر ۾ وچ اوڀر جي صورتحال عالمي توجهه جو مرڪز بڻيل آهي.
اميد ظاهر ڪئي پئي وڃي ته ٻنهي اڳواڻن وچ ۾ غزه، ايران، شام، وچ اوڀر جي مجموعي صورتحال، علائقائي سلامتي، دهشتگردي جي خاتمي، توانائي جي تحفظ ۽ عالمي سياسي منظرنامي بابت به تفصيلي خيالن جي ڏي وٺ ٿيندي.
پاڪستان ۽ ترڪي ٻئي ايران جا پاڙيسري ملڪ آهن ۽ تهران سان ويجها ۽ دوستاڻا لاڳاپا رکن ٿا. ان ڪري علائقي ۾ پائيدار امن، استحڪام ۽ مستقبل جي علائقائي حڪمت عملي بابت ٻنهي اڳواڻن جي مشاورت کي خاص اهميت ڏني پئي وڃي.
سفارتي مبصرن موجب اسلام آباد ۽ انقره خطي ۾ تڪرار بدران مذاڪرات، اقتصادي سهڪار ۽ علائقائي استحڪام جي واڌاري واري گڏيل موقف تي متفق آهن، جنهن سان مستقبل ۾ ٻنهي ملڪن جو ڪردار وڌيڪ اهم ٿي سگهي ٿو.
دوري جو اقتصادي پهلو پڻ انتهائي اهم قرار ڏنو پيو وڃي. وزيراعظم شهباز شريف استنبول ۾ پاڪستان-ترڪي بزنس فورم کي خطاب ڪندو، جنهن ۾ ترڪي جو نائب صدر جودت يلماز، ٻنهي ملڪن جا وزير، معروف صنعتڪار، سيڙپڪار، واپاري تنظيمن جا نمائندا ۽ اعليٰ عملدار شرڪت ڪندا.
بزنس فورم جو مقصد ترڪي جي ڪاروباري برادري آڏو پاڪستان ۾ موجود وسيع سيڙپڪاري جي موقعن کي اجاگر ڪرڻ آهي. ان موقعي تي خصوصي اقتصادي زونز (SEZs)، توانائي، انفارميشن ٽيڪنالاجي، بنيادي ڍانچي، صنعت، واپار ۽ نجڪاري سميت مختلف شعبن ۾ سيڙپڪاري جا امڪان پيش ڪيا ويندا.
وزيراعظم شهباز شريف ترڪي جي مختلف اهم ڪاروباري گروپن جي چيف ايگزيڪيوٽو آفيسرن سان الڳ الڳ ملاقاتون پڻ ڪندو، جن دوران پاڪستان ۾ سيڙپڪاري، حڪومتي سهولتن، ڪاروباري رعايتن ۽ ٻطرفي اقتصادي سهڪار جي نون منصوبن تي خيالن جي ڏي وٺ ڪئي ويندي.
