اورنگي ٽائون سيڪٽر نائن اي ۾ شادي جي تقريب ۾ هوائي فائرنگ جي نتيجي ۾ نوجوان مارجي ويو هڪ عورت زخمي ٿي پئي، واقعي جو ڪيس 5 معلوم ۽ هڪ اڻچاتل جوابدار جي خلاف داخل ڪيو ويو آهي.
پوليس فوري ڪارروائي ڪندي هوائي فائرنگ ۾ ملوث هڪ ڏوهاري کي گرفتار ڪري هٿيار هٿ ڪري ورتو، ڪيس ۾ نامزد ٻين جوابدارن جي گرفتاري لاءِ ڇاپا هنيا پيا وڃن. رپورٽ موجب ڇنڇر ۽ آچر جي رات اورنگي ٽائون ٿاڻي جي علائقي اورنگي ٽائون سيڪٽر نائن ۾ شادي جي تقريب ۾ هوائي فائرنگ سبب معظم ولد منصور علي نالي نوجوان مارجي ويو جڏهن ته 39 ورهين جي عورت نجمه زخمي ٿي پئي هئي، پوليس واقعي جو ڪيس مقتول نوجوان جي ڀاءُ سفيان علي جي مدعيت ۾ داخل ڪري ورتو.
ڪيس ۾ قتل جا قلم شامل ڪيا ويا آهن، ڪيس ۾ 5 معلوم ۽ هڪ نامعلوم جوابدار کي نامزد ڪيو ويو آهي. مقتول نوجوان پنهنجن مائٽن جي شادي تقريب ۾ قوالي نائٽ جي پروگرام ۾ آيو هو، قوالي نائٽ جي پروگرام ۾ شديد هوائي فائرنگ ڪئي وئي. تقريب ۾ هوائي فائرنگ جي واقعي جي سي سي ٽي وي فوٽيج به سامهون اچي وئي آهي جنهن ۾ ڏسي سگهجي ٿو ته تقريب جي دوران اوچتو هوائي فائرنگ شروع ٿي انهي دوران هڪ نوجوان گولي لڳڻ سبب سخت زخمي ٿيڻ کان پوءِ زمين تي ڪري پيو. فائرنگ کان پوءِ تقريب ۾ موجود ماڻهن ۾ افراتفري پکڙجي وئي. ڀرپاسي ۾ بيٺل ماڻهن فوري طور تي نوجوان جي مدد لاءِ اڳيان وڌيا پر گولي ويجهو کان لڳڻ سبب نوجوان ٿڏي تي فوت ٿي ويو.
شادي جي تقريب ۾ فائرنگ جي واقعي ۾ نوجوان جي مارجي وڃڻ ۽ هڪ عورت جي زخمي ٿيڻ تي اورنگي ٽائون پوليس ڪارروائي ڪندي هڪ جوابدار ثاقب ولد عبدالخالق کي گرفتار ڪري ورتو. جوابدار کان فائرنگ ۾ استعمال ٿيل نائن ايم ايم پسٽل ۽ موقعي تان گولي جو خول به هٿ ڪيو ويو آهي. پوليس اختيارين جو چوڻ آهي ته فائرنگ ۾ ملوث ٻين جوابدارن جي ڳولا جاري آهي. مقتول معظم جي گهر ڀاتين پوليس کان جوابدارن جي خلاف قانوني ڪارروائي جو مطالبو ڪيو آهي. پوليس اختيارين جو چوڻ آهي ته جلد ئي ذميوارن کي گرفتار ڪري سخت کان سخت سزا ڏني ويندي.
