ايران جي پاسداران انقلاب جي ترجمان دعويٰ ڪئي آهي ته ايراني فوج صوبي اصفهان جي ڏاکڻي علائقي ۾ آمريڪي فوجي ڪارروائي جي دوران 2 سي 130 جهاز ۽ 2 بليڪ هاڪ هيليڪاپٽر تباهه ڪري ڇڏيا.
ايراني ميڊيا موجب اها ڪارروائي اهڙي وقت ٿي جڏهن آمريڪي فوج هڪ ڪيرايل ويڙهاڪ جهاز جي گم ٿي ويل عملي جي ميمبر کي ريسڪيو ڪرڻ جي ڪوشش ڪري رهي هئي.
انهي کان اڳ به اهڙيون رپورٽون سامهون آيون هيون ته انهي آپريشن جي دوران هڪ سي 130 جهاز تباهه ٿي ويو هو پر هاڻ پاسداران انقلاب وڌيڪ جهازن ۽ هيليڪاپٽرن کي نشانو بنائڻ جي دعويٰ ڪئي آهي.
ترجمان موجب ايراني دفاعي نظام آمريڪي فوجين جي چرپر کي وقت تي نشانو بنايو ۽ دشمن کي ڳرو نقصان پهچايو. ٻئي طرف انهي دعويٰ تي اڃان تائين آمريڪي اختيارين طرفان ڪوبه باضابطه رد عمل سامهون نه اچي سگهيو آهي.
ماهرن موجب جيڪڏهن اها دعويٰ صحيح ثابت ٿئي ٿي ته اها خطي ۾ جاري ڇڪتاڻ ۾ وڌيڪ اضافو ڪري سگهي ٿي، ڇو ته اهو واقعو آمريڪا ۽ ايران جي وچ ۾ سڌو سنئون فوجي تڪرار کي وڌيڪ سنگين بنائي سگهي ٿو.
