پاڪستاني اداڪاره ۽ ميزبان فضا علي پنهنجي مارننگ شو ۾ مڙس اعجاز خان سان گڏ وائرل ٿيندڙ ويڊيو تي ردعمل ڏيندي چيو آهي ته اهو صرف هڪ ننڍڙو ۽ عام لمحو هو، جنهن کي بنا ڪنهن مقصد جي سوشل ميڊيا تي وڌائي پيش ڪيو ويو.
تازو فضا علي پنهنجي مارننگ شو ۾ مڙس اعجاز خان کي مهمان طور گهرايو، جتي هنن پنهنجي ملاقات ۽ محبت جي ڪهاڻي بيان ڪئي. پروگرام دوران فضا علي جي ڌيءَ فرال به موجود هئي، جنهن لائيو شو ۾ پنهنجي والد کان فرمائش ڪئي ته هو پنهنجي ماءُ کي کڻي ڏيکاري.
ان فرمائش تي اعجاز خان فضا علي کي پنهنجي ڪلهي تي کڻي ورتو، جنهن دوران اسٽوڊيو ۾ موجود سڀئي ماڻهو خوشيءَ سان تاڙيون وڄائيندا رهيا. هي منظر ڪئميرا ۾ قيد ٿيو ۽ پوءِ سوشل ميڊيا تي تيزي سان وائرل ٿي ويو.
وائرل ويڊيو کان پوءِ ڪيترن صارفين طرفان تنقيد به ڪئي وئي، جن جو چوڻ هو ته اهڙا منظر ٽي وي شو ۾ مناسب نه هئا. ڪجهه ماڻهن ان کي غير ضروري نمائش به قرار ڏنو.
تنقيد کان پوءِ فضا علي انسٽاگرام اسٽوري تي پنهنجو ردعمل ڏيندي چيو ته اهو صرف هڪ ننڍڙو لمحو هو، جنهن کي بنا ڪنهن مقصد جي وائرل ڪيو ويو ۽ ان کي غلط رخ ڏنو ويو.
سوشل ميڊيا تي هن معاملي تي ملا جلا ردعمل ڏسڻ ۾ اچي رهيو آهي، جتي ڪجهه ماڻهو فضا علي جي وضاحت سان اتفاق ڪن ٿا، جڏهن ته ڪجهه اڃا به ان عمل تي تنقيد جاري رکيو ويٺا آهن.
