ممبئي(ويب ڊيسڪ)ڀارتي ريئلٽي شو ’بگ باس 20‘ جي ايندڙ هفتي نشر ٿيندڙ خاص پروگرام ’وِيڪ اينڊ ڪا وار‘ ۾ سلمان خان بدران فلمساز روهت شيٽي ميزباني ڪندي نظر ايندو. سلمان خان 18 آڪٽوبر تي ٿيل قسط دوران شو جي شرڪت ڪندڙن کي ان تبديليءَ بابت آگاهه ڪيو هو.
ڀارتي ميڊيا موجب، سلمان خان جي غيرموجودگيءَ جو سبب اڳواٽ طئي ٿيل پيشوراڻي مصروفيتون ٻڌايو پيو وڃي. تنهن هوندي به، سندس غيرموجودگي اهڙي وقت ٿي آهي، جڏهن اداڪار ٽائيگر شروف جي گاڏيءَ تي فائرنگ واري واقعي کانپوءِ سلمان خان جي سيڪيورٽي پڻ خبرن ۾ آهي.
ميڊيا رپورٽن موجب، ٽائيگر شروف جي گاڏيءَ تي فائرنگ کانپوءِ سماجي رابطن جي ويب سائيٽن تي هڪ مبينا پيغام سامهون آيو، جنهن ۾ حملي جي ذميواري قبول ڪرڻ ۽ ممبئيءَ جي فلمي دنيا سان لاڳاپيل ڪجهه ماڻهن کي ڌمڪيون ڏيڻ جي دعويٰ ڪئي وئي. ان پيغام ۾ سلمان خان سان گڏ ڪم ڪندڙ ماڻهن کي پڻ خبردار ڪيو ويو هو.
مبينا پيغام ۾ انيل پنڊت نالي هڪ شخص پاڻ کي لارنس بشنوئي ٽولي سان لاڳاپيل ڄاڻائيندي دعويٰ ڪئي ته هو ۽ هرمن سنڌو ان واقعي ۾ ملوث آهن. پيغام ۾ چيو ويو ته پهرين ٽائيگر شروف سان رابطو ڪري کيس سمجهائڻ جي ڪوشش ڪئي وئي، پر مبينا طور ڳالهه نه مڃڻ تي کيس نشانو بڻايو ويو. پيغام ۾ اهو به ڌمڪايو ويو ته سلمان خان سان گڏ ڪم ڪندڙ يا سندس ڳالهه نه مڃيندڙ ٻين ماڻهن کي به اهڙن نتيجن کي منهن ڏيڻو پئجي سگهي ٿو.
ان سان گڏ بشنوئي گينگ سلمان خان کان معافي وٺڻ جو مطالبو ڪندي کيس سخت نتيجا ڀوڳڻ جي ڌمڪي به ڏني آهي.
