ڪاڪول: پاڪ فضائيه جي سربراهه ايئر چيف مارشل ظهير احمد بابر سدھو چيو آهي ته گذريل سال مئي ۾ آپريشن “بنيان المرصوص” دوران دشمن پاڪستان جي طاقت، صلاحيت ۽ مهارت ڏسي حيران رهجي ويو. هن چيو ته پاڪستان هر قسم جي جارحيت جو ڀرپور ۽ موثر جواب ڏيڻ جي صلاحيت رکي ٿو.
پاڪستان ملٽري اڪيڊمي ڪاڪول ۾ پاسنگ آئوٽ پريڊ کي خطاب ڪندي ايئر چيف چيو ته عالمي امن لاءِ پاڪستان جي سياسي ۽ عسڪري قيادت جون ڪوششون ساراهه جوڳيون آهن. هن خاص طور تي فيلڊ مارشل سيد عاصم منير جي ڪوششن کي واکاڻيندي چيو ته انهن عالمي سطح تي امن لاءِ اهم ڪردار ادا ڪيو آهي.
ايئر چيف جو چوڻ هو ته پاڪستان هڪ پرامن ملڪ آهي جيڪو تڪرارن جو حل هميشه ڳالهين ذريعي ڳولڻ تي يقين رکي ٿو، پر جيڪڏهن ملڪ تي ڪو به حملو ڪيو ويو ته ان جو جواب ڀرپور طاقت سان ڏنو ويندو. هن وڌيڪ چيو ته “معرڪو حق” ۽ “بنيان المرصوص” ۾ پاڪ فوج جي حڪمت عملي سڄي دنيا ڏٺي، جنهن پاڪستان جي دفاعي صلاحيتن کي واضح ڪيو.
هن پنهنجي خطاب ۾ چيو ته پاڪ فضائيه نه صرف دشمن جا جهاز ڪيرائڻ ۾ ڪامياب رهي پر هن تاريخ به رقم ڪئي، جيڪا ملڪ جي دفاعي تاريخ ۾ هڪ اهم باب طور ياد رکي ويندي. ايئر چيف زور ڏنو ته پاڪ فضائيه جديد ٽيڪنالاجي، پيشه ورانه مهارت ۽ اعليٰ تربيت جي ذريعي ملڪ جي فضائي سرحدن جي حفاظت لاءِ هر وقت تيار آهي.
هن چيو ته مئي ۾ ٿيندڙ ان معرڪي دوران دشمن پاڪستان جي تياري ۽ حڪمت عملي ڏسي حيران ٿي ويو، جيڪو پاڪ فوج جي گڏيل طاقت ۽ هم آهنگي جو نتيجو هو. سندس چوڻ هو ته مستقبل ۾ به ڪنهن به خطري کي منهن ڏيڻ لاءِ پاڪستان جون فوجي قوتون مڪمل طور تي تيار آهن.
ان موقعي تي ايئر چيف مارشل ظهير احمد بابر سدھو پاسنگ آئوٽ پريڊ جو معائنو پڻ ڪيو ۽ ٽريننگ دوران نمايان ڪارڪردگي ڏيکاريندڙ ڪيڊٽس ۾ انعامات ۽ شيلڊز ورهايون. هن نوجوان آفيسرن کي مخاطب ڪندي چيو ته هو پنهنجي ذميوارين کي ايمانداري، محنت ۽ حب الوطني سان نڀائين.
تقريب دوران ملڪي دفاع، پيشه ورانه تربيت ۽ نظم و ضبط جو شاندار مظاهرو ڪيو ويو، جنهن کي شرڪت ڪندڙن تمام گهڻو ساراهيو. ايئر چيف پنهنجي خطاب جي پڄاڻي تي چيو ته پاڪستان جي دفاع لاءِ قوم ۽ فوج گڏجي بيٺل آهن، ۽ ملڪ جي سلامتي تي ڪڏهن به سمجهوتو نه ڪيو ويندو۔
