ڀارت جي مليالم فلم انڊسٽري سان واسطو رکندڙ مشهور اداڪار سدھارتھ وينوگوپال ڊگهي عرصي کان ڪينسر سان وڙهندي آخرڪار زندگي جي جنگ هارائي ويو. هو لڳ ڀڳ ٻن سالن کان هن موذي مرض سان مقابلو ڪري رهيو هو.
ڀارتي ميڊيا رپورٽن موجب سندس وفات جي تصديق اداڪارا سيما جي نير سوشل ميڊيا تي ڪئي. هن پنهنجي پوسٽ ۾ گهري ڏک جو اظهار ڪندي لکيو ته گذريل ٻن سالن دوران هوءَ سدھارتھ لاءِ مسلسل وڙهندي رهي، پر هاڻي سندس جسم ۽ ذهن ٿڪجي چڪا هئا. هن چيو ته “اڄ خدا اهو فيصلو ڪيو آهي ته هاڻي کيس وڌيڪ تڪليف نه سهيڻي پوندي، پر مان اهو درد برداشت نٿي ڪري سگهان.”
سدھارتھ وينوگوپال ڀارتي رياست ڪيرالا جي ضلعي ٿريشور سان تعلق رکندو هو. هو ننڍپڻ کان ئي اداڪاري جو شوقين هو ۽ ڪاليج جي ڏينهن کان هن فن جي دنيا ۾ قدم رکڻ شروع ڪيو. پنهنجي ڪيريئر جي شروعات ۾ هن بطور پريزينٽر به ڪم ڪيو ۽ پوءِ ٽي وي ڊرامن جو حصو بڻيو، جتي هن کي خاص سڃاڻپ ملي.
هو مليالم انڊسٽري ۾ هڪ ڄاتل سڃاتل نالو هو ۽ پنهنجي اداڪاري سبب مداحن ۾ مقبوليت ماڻي چڪو هو.
سدھارتھ وينوگوپال پنهنجي پويان ماءُ ۽ ننڍو ڀاءُ ڇڏي ويو آهي، جڏهن ته سندس والد ڪجهه سال اڳ لاڏاڻو ڪري چڪو هو.
سندس وفات تي فلمي دنيا ۽ مداحن طرفان گهري ڏک ۽ افسوس جو اظهار ڪيو پيو وڃي۔
