اوپن اي آءِ جو مشهور ترين آرٽيفيشل انٽيليجنس (اي آءِ) چيٽ بوٽ چيٽ جي پي ٽي روزانو ڪروڙين ماڻهو استعمال ڪن ٿا۔
هاڻي ڪمپني هڪ رپورٽ جاري ڪئي آهي، جنهن ۾ دعويٰ ڪئي وئي آهي ته روزانو 4 ڪروڙ ماڻهو صحت سان لاڳاپيل سوالن جا جواب حاصل ڪرڻ لاءِ چيٽ جي پي ٽي استعمال ڪن ٿا۔
رپورٽ موجب، صارف علامتن، دوائن، علاج جي طريقن ۽ ٻين طبي تفصيلن بابت ڄاڻ حاصل ڪرڻ لاءِ چيٽ جي پي ٽي ڏانهن رجوع ڪن ٿا۔
رپورٽ ۾ ٻڌايو ويو آهي ته چيٽ جي پي ٽي کان پڇيا ويندڙ سوالن مان 5 سيڪڙو کان وڌيڪ صحت سان لاڳاپيل هوندا آهن۔
اهڙي طرح چيٽ جي پي ٽي جي 80 ڪروڙ صارفن مان 20 ڪروڙ ماڻهو هر هفتي گهٽ ۾ گهٽ هڪ ڀيرو ضرور صحت بابت ڪو سوال پڇن ٿا۔
انهن مان گهڻا ماڻهو اهو ڄاڻڻ جي ڪوشش ڪن ٿا ته سندن مٿي جو سور ڪيترو سنجيده آهي، يا ڪنهن پيچيده تشخيص جو مطلب ڇا آهي، يا ڇا نيون دوائون استعمال ڪرڻ سبب کين ٿڪاوٽ محسوس ٿي رهي آهي۔
رپورٽ ۾ وڌيڪ ٻڌايو ويو آهي ته 55 سيڪڙو صارف علامتن بابت ڄاڻ حاصل ڪرڻ جي ڪوشش ڪن ٿا۔
52 سيڪڙو ماڻهو هن اي آءِ ٽول کي صحت سان لاڳاپيل سوالن جا جواب حاصل ڪرڻ لاءِ استعمال ڪن ٿا، جڏهن ته 48 سيڪڙو طبي اصطلاحن يا هدايتن کي سمجهڻ جي ڪوشش ڪن ٿا۔
ان کان علاوه 44 سيڪڙو ماڻهو اي آءِ استعمال ڪري علاج جي مختلف اختيارن بابت ڄاڻ حاصل ڪن ٿا۔
اوپن اي آءِ موجب، اي آءِ ٽيڪنالاجي انهن ماڻهن لاءِ خاص طور مددگار ثابت ٿي رهي آهي، جن لاءِ فوري طور ڊاڪٽر تائين رسائي حاصل ڪرڻ مشڪل هوندي آهي۔
