اسلام آباد ۽ راولپنڊي ۾ سيڪيورٽي صورتحال سبب هاءِ الرٽ نافذ ڪيو ويو آهي، جنهن کان پوءِ ميٽرو بس سروس سميت نجي، عوامي ۽ مال بردار ٽرانسپورٽ کي تاحڪم ثاني معطل ڪيو ويو آهي۔
انتظاميه موجب راولپنڊي ۽ اسلام آباد ۾ هر قسم جي ٽرانسپورٽ جي آمد رفت بند رهندي. هي قدم سيڪيورٽي خدشن کي نظر ۾ رکندي کنيو ويو آهي۔
ميٽرو بس انتظاميه تصديق ڪئي آهي ته بس سروس پمز اسٽيشن کان پاڪ سيڪريٽريٽ تائين مڪمل طور بند آهي، جيڪا ايندڙ حڪمن تائين معطل رهندي. البت صدر اسٽيشن کان ڪچهري تائين محدود روٽ تي سروس جزوي طور جاري آهي۔
راولپنڊي ۾ سيڪيورٽي وڌيڪ سخت ڪندي پوليس جون اضافي نفريون مقرر ڪيون ويون آهن. اهم شاهراهن، داخلي ۽ خارجي رستن ۽ حساس هنڌن تي سخت چيڪنگ جاري آهي۔
ضلعي انتظاميه موجب صدر کان فيض آباد، مري روڊ ۽ ايڪسپريس وي تي اضافي ناڪا لڳايا ويا آهن. فيض آباد، پير ودھائي ۽ 26 نمبر بس اسٽينڊ به بند ڪيا ويا آهن، جڏهن ته فيض آباد جا واپاري مرڪز به عارضي طور بند رهندا۔
ٽريفڪ پوليس شهرين لاءِ نئون ٽريفڪ پلان جاري ڪيو آهي. ريڊ زون ۽ وڌايل ريڊ زون کي هر قسم جي ٽريفڪ لاءِ مڪمل طور بند ڪيو ويو آهي، ۽ شهرين کي متبادل رستن ذريعي سفر ڪرڻ جي هدايت ڪئي وئي آهي۔
شهرين کي اپيل ڪئي وئي آهي ته غير ضروري سفر کان پاسو ڪن ۽ ٽريفڪ پوليس جي هدايتن تي عمل ڪن ته جيئن ڪنهن به قسم جي مشڪلات يا رش کان بچي سگهجي۔
مجموعي طور تي جڙواڻ شهرن ۾ صورتحال غير معمولي آهي ۽ سيڪيورٽي ادارا مڪمل طور متحرڪ آهن. انتظاميه جو چوڻ آهي ته حالتون بهتر ٿيڻ بعد پابنديون آهستي آهستي ختم ڪيون وينديون۔
