بين الاقوامي جريدي ايشيا ٽائمز جي رپورٽ موجب پاڪستان سان بهتر سفارتي لاڳاپن کان پوءِ آمريڪا لاءِ ڀارت تي ڀروسو ڪرڻ وڌيڪ ڏکيو ٿي ويو آهي۔
رپورٽ ۾ چيو ويو آهي ته پاڪستان ايران–آمريڪا ڳالهين ۾ اهم ڪردار ادا ڪيو، جڏهن ته خطي جي اهم معاملن تي ڀارت جي سفارتڪاري گهڻو ڪري خاموش نظر آئي۔
ايشيا ٽائمز موجب پاڪستان مسلسل خطي ۾ امن بحالي لاءِ سفارتي ڪوششن ۾ سرگرم رهيو، جڏهن ته ڀارتي قيادت طرفان بين الاقوامي سطح تي اهڙي فعال ڪردار جو اظهار گهٽ ڏٺو ويو۔
رپورٽ ۾ وڌيڪ چيو ويو آهي ته آمريڪي صدر ڊونلڊ ٽرمپ ۽ ڀارتي وزيراعظم نريندر مودي جي وچ ۾ ملاقات دوران ڳالهه ٻولهه گهڻو ڪري تيل ۽ سپلائي نظام تائين محدود رهي، جڏهن ته پاڪستان مختلف ملڪن سان رابطن ذريعي خطي ۾ استحڪام لاءِ ڪوششون جاري رکيون۔
ايشيا ٽائمز جو اهو به چوڻ آهي ته پاڪستان جي فعال سفارتڪاري سبب آمريڪا ۽ پاڪستان جا لاڳاپا وڌيڪ ويجها ٿيا آهن، جنهن کان پوءِ ڀارت تي مڪمل اعتماد ڪرڻ آمريڪا لاءِ مشڪل ٿي ويو آهي۔
رپورٽ موجب ايران ۽ آمريڪا وچ ۾ تڪرار جي شروعات کان ئي پاڪستان جنگ بندي ۽ ڳالهين لاءِ ڪوششون ڪيون. پاڪستان جي سياسي ۽ فوجي قيادت مسلسل آمريڪي ۽ ايراني اختيارين سان رابطا ۾ رهي۔
دنيا جي ڪيترن ئي ملڪن، بشمول آمريڪي صدر ڊونلڊ ٽرمپ ۽ ايران جي صدر مسعود پزشڪيان، پاڪستان جي امن ڪوششن کي ساراهيو آهي۔ ٽرمپ ڪيترائي ڀيرا پاڪستان جي وزيراعظم شهباز شريف ۽ فيلڊ مارشل عاصم منير کي سٺي قيادت قرار ڏئي چڪو آهي۔
ٻئي پاسي ڀارت ۾ اپوزيشن ۽ ميڊيا طرفان وزيراعظم نريندر مودي تي خطي جي سفارتي صورتحال بابت تنقيد پڻ ڏٺي پئي وڃي۔
مجموعي طور تي رپورٽ موجب خطي ۾ طاقت جو توازن سفارتي سطح تي تبديل ٿي رهيو آهي، جتي پاڪستان کي وڌيڪ سرگرم ۽ اثرائتو رانديگر طور پيش ڪيو پيو وڃي۔
