لاهور: پاڪستان سپر ليگ (پي ايس ايل) سيزن 11 جو وڏو فائنل اڄ پشاور زلمي ۽ حيدرآباد ڪنگز مين جي وچ ۾ قذافي اسٽيڊيم لاهور ۾ کيڏيو ويندو، جتي ڪرڪيٽ جا شوقين هڪ دلچسپ مقابلي جا منتظر آهن۔
فائنل کان اڳ رنگا رنگ اختتامي تقريب به منعقد ٿيندي، جنهن ۾ ملڪ جا مشهور گلوڪار عاطف اسلم، علي عظمت، عارف لوھار، آئمه بيگ ۽ صابري سسٽرز پنهنجي پرفارمنس سان شائقين کي محظوظ ڪندا۔
پشاور زلمي جي ڪپتان بابر اعظم چيو آهي ته هر ڪپتان جي خواهش هوندي آهي ته هو ٽرافي کڻي، ۽ هو به پنهنجي ٽيم سان گڏ اها ڪاميابي حاصل ڪرڻ چاهي ٿو۔ هن چيو ته ٽيم ڀرپور تياري سان ميدان ۾ لهندي۔
ٻئي پاسي حيدرآباد ڪنگز مين جي ڪپتان مارنس لبوشين چيو ته سندن ٽيم سخت مقابلا کيڏي فائنل تائين پهتي آهي، ۽ هو پُراميد آهن ته فائنل ۾ به بهترين ڪارڪردگي ڏيکاريندا۔
پي سي بي چيئرمين محسن نقوي جي صدارت هيٺ اجلاس ۾ فائنل جي انتظامن جو تفصيلي جائزو ورتو ويو، جتي هدايت ڏني وئي ته شائقين لاءِ بهترين سهولتون مهيا ڪيون وڃن ۽ ايونٽ کي شاندار بڻايو وڃي۔
محسن نقوي ڪرڪيٽ شوقينن کي اپيل ڪئي ته هو شام 6 وڳي تائين اسٽيڊيم پهچي وڃن ته جيئن اختتامي تقريب جو به لطف وٺي سگهن۔
هاڻي اهم سوال اهو آهي ته ٽرافي ڪير کڻندو؟ ماهرن موجب ٻنهي ٽيمن وٽ مضبوط اسڪواڊ موجود آهي، تنهنڪري مقابلو انتهائي سخت ۽ دلچسپ ٿيڻ جو امڪان آهي۔ جيڪو به ٽيم دٻاءُ کي بهتر سنڀاليندي، اهو ئي ڪاميابي ماڻي سگهي ٿو۔
واضح رهي ته پي ايس ايل 11 جو فائنل جيو سپر تي سڌو سنئون نشر ڪيو ويندو۔
