وفاقي محتسب سيڪريٽريٽ ڪراچي پاران عوامي شڪايتن جي ازالي ۾ نمايان خدمتون انجام ڏيندڙ ادارن جي سربراهن کي تعريفي اسناد سان نوازيو ويو
ڪراچي، 4 جون 2026ع: وفاقي محتسب سيڪريٽريٽ جي علائقائي آفيس ڪراچي ۾ هڪ تقريب منعقد ڪئي وئي، جنهن ۾ عوام، خاص ڪري گهٽ آمدني وارن ۽ محروم طبقي جي مسئلن ۽ شڪايتن جي مؤثر ازالي ۾ نمايان ڪردار ادا ڪندڙ مختلف عوامي خدمت ڪندڙ ادارن جي خدمتن جي اعتراف طور تعريفي اسناد ورهايون ويون.
تعريفي اسناد جناب امير احمد شيخ، ميمبر انچارج/صوبائي ڪوآرڊينيٽر، وفاقي محتسب سيڪريٽريٽ ڪراچي طرفان ممتاز سرڪاري ادارن جي نمائندن ۾ ورهايون ويون، جن ۾ جناب مونيس عبدالله علوي، اڳوڻو چيف ايگزيڪيوٽو آفيسر، ڪي اليڪٽرڪ؛ جناب محمد امين راجپوت، مينيجنگ ڊائريڪٽر، سوئي سدرن گيس ڪمپني (SSGC)؛ جناب عامر علي خان، ڊائريڪٽر جنرل، نادرا؛ جناب مبشر، ڊائريڪٽر، اي او بي آءِ، چيئرمين اي او بي آءِ جي نمائندگي ۾؛ ۽ جناب سعيد احمد عباسي، ڊائريڪٽر، اميگريشن اينڊ پاسپورٽس شامل هئا.
ان موقعي تي سيد انور حيدر، سينيئر ايڊوائزر؛ جناب مولا بخش، ايڊوائزر؛ ۽ جناب راشد احمد شيخ، ڊائريڪٽر، وفاقي محتسب سيڪريٽريٽ، علائقائي آفيس ڪراچي پڻ موجود هئا.
تقريب کي خطاب ڪندي جناب امير احمد شيخ لاڳاپيل ادارن جي شڪايتن جي بروقت ازالي ۾ تعاون کي ساراهيو. هن چيو ته عوامي شڪايتن جي مؤثر حل لاءِ ادارن وچ ۾ ويجهو رابطو ۽ باهمي سهڪار انتهائي ضروري آهي، ۽ گڏيل ڪوششن سان ئي بهتر نتيجا حاصل ڪري سگهجن ٿا.
ميمبر انچارج خاص طور تي نادرا پاران عوام کي سهولتون فراهم ڪرڻ ۽ خدمتن ۾ بهتري لاءِ کنيل عوام دوست قدمن کي ساراهيو. هن سوئي سدرن گيس ڪمپني، ڪي اليڪٽرڪ، اي او بي آءِ ۽ ڊائريڪٽوريٽ جنرل اميگريشن اينڊ پاسپورٽس پاران وفاقي محتسب سيڪريٽريٽ ڏانهن موصول ٿيندڙ شڪايتن جي مؤثر ۽ بروقت ازالي ۾ ادا ڪيل ڪردار کي به خراج تحسين پيش ڪيو.
پنهنجن اختتامي لفظن ۾ جناب امير احمد شيخ سڀني ادارن جي سربراهن ۽ نمائندن جو ٿورا مڃيا ۽ اعلان ڪيو ته ايندڙ ڪجهه مهينن اندر انهن ادارن جي سربراهن جي معزز وفاقي محتسب سان ملاقات جو اهتمام ڪيو ويندو ته جيئن ادارتي رابطا وڌيڪ مضبوط بڻايا وڃن ۽ عوامي خدمت جي نظام کي وڌيڪ مؤثر بڻايو وڃي.
تقريب جي پڄاڻي تي ڊائريڪٽر جنرل نادرا، جناب عامر علي خان، جناب امير احمد شيخ کي شيلڊ پيش ڪئي، جڏهن ته وفاقي محتسب سيڪريٽريٽ، علائقائي آفيس ڪراچي جي آفيسرن کي پڻ عوامي خدمت ۽ شڪايتن جي ازالي ۾ سندن خدمتن جي اعتراف طور يادگاري تحفا پيش ڪيا ويا۔
