ٽنڊوڄام پوليس جي ڪارروائي، 137 ڊٻا سفينا گٽڪا سان ڀريل مزدا هٿ، جوابدار فرار

ٽنڊوڄام پوليس ڳجهي اطلاع تي ڪارروائي ڪندي وڏي مقدار ۾ سفينا گٽڪي سان ڀريل هڪ مزدا گاڏي هٿ ڪري ورتي، جڏهن ته جوابدار پوليس کي ڏسي گاڏي ڇڏي فرار ٿيڻ ۾ ڪامياب ٿي ويا، رپورٽ موجب کيسانا موري ڀرسان آبڙي موڙ وٽ مزدا نمبر TKG-436 کي روڪي تلاشي ورتي وئي، جنهن دوران گاڏي مان 137 ڊٻا سفينا گٽڪا برآمد ڪيا ويا. ايس ايڇ او ٽنڊوڄام مالڪ ابڙو موجب مزدا ۾ سوار عدنان پٺاڻ، رزاق جمالي ۽ گل جمالي پوليس ڪارروائي دوران فرار ٿي ويا، جن جي ڳولا جاري آهي، هوڏانهن علائقي واسين دعويٰ ڪئي آهي ته مزدا گاڏي کي روڪڻ کان پوءِ پوليس هڪ بااثر شخص جي فارم هائوس تي ڪيترائي ڪلاڪ بيهاري رکيو، جتي مبينا طور ڪجهه ڊيلر به پهچي ويا هئا. ذريعن موجب بعد ۾ فارم هائوس تي بيٺل گاڏي جون وڊيوز سوشل ميڊيا تي وائرل ٿيڻ کان پوءِ پوليس مزدا کي ٿاڻي منتقل ڪيو، ٽنڊوڄام پوليس جوابدارن خلاف ڪيس نمبر 128/2026 قلم 8th SPOP MSS GM Act 2019 تحت داخل ڪري وڌيڪ جاچ شروع ڪري ڇڏي آهي