نئين دهلي: ڀارت ۾ هڪ شخص مبينا طور نشي جي حالت ۾ پنهنجي پيءُ کي ڪهاڙيءَ جا وار ڪري بي رحمي سان قتل ڪري ڇڏيو.
ڀارتي ميڊيا موجب اهو واقعو جھارکنڊ رياست جي بوڪارو ضلعي جي ڪرپاني ڳوٺ ۾ پيش آيو، جتي 30 ورهين جي ارجن ڪرمالي پنهنجي پيءُ تي ڪهاڙيءَ سان حملو ڪري کيس قتل ڪري ڇڏيو.
پوليس موجب جوابدار ارجن ڪرمالي پنهنجي ماما جي گهر هڪ تقريب ۾ شرڪت ڪرڻ کانپوءِ دير سان گهر پهتو، جنهن تي سندس پيءُ کيس شراب پيئڻ ۽ نشي جي حالت ۾ گهر اچڻ تي ڇڙٻ ڏني.
پوليس جو چوڻ آهي ته پيءُ جي ڳالهين تي ارجن ڪاوڙجي پيو، ٻنهي ۾ جهيڙو شروع ٿي ويو، جنهن دوران هن گهر ۾ پيل ڪهاڙي کڻي پنهنجي پيءُ جي مٿي تي وار ڪيو، جنهن سبب هو موقعي تي ئي فوت ٿي ويو.
جاچ اختيارين موجب مقتول پنهنجي پٽ جي شراب نوشي جي عادت تي ناراض رهندو هو، ڇاڪاڻتہ ان سبب گهر ۾ اڪثر تڪرار ۽ بدامني پيدا ٿيندي هئي.
پوليس وڌيڪ ٻڌايو ته ارجن شراب جي نشي ۾ پنهنجي زال تي پڻ مبينا طور تشدد ڪندو هو، جنهن ڪري سندس زال کيس ڇڏي پنهنجي والدين جي گهر هلي وئي هئي.
واقعي کانپوءِ ڳوٺاڻن مبينا جوابدار کي پڪڙي ورتو ۽ پوليس کي اطلاع ڏيڻ کان اڳ کيس گهر اندر ٻڌي ڇڏيو. اطلاع ملڻ تي پوليس موقعي تي پهچي جوابدار کي پنهنجي تحويل ۾ وٺي گرفتار ڪري ورتو.
پوليس موجب واقعي بابت وڌيڪ جاچ جاري آهي ۽ قانون موجب جوابدار خلاف ڪارروائي ڪئي پئي وڃي.
