واشنگٽن: (آچر: 29 مارچ 2026ع) آمريڪا ۾ صدر ڊونلڊ ٽرمپ جي پاليسين ۽ ايران جنگ جي خلاف وڏي پيماني تي نو ڪنگز جي عنوان سان احتجاجي ريليون ڪڍيون ويون، جنهن ۾ ميڊيا رپورٽن موجب 70 لک کان وڌيڪ ماڻهن شرڪت ڪئي.
مظاهرين جنگ جي خاتمي ۽ حڪومتي پاليسين جي خلاف سخت نعريبازي ڪئي، جڏهن ته منتظمين موجب ملڪ جي 50 رياستن مان 3 هزار کان وڌيڪ هنڌن تي احتجاجي مظاهرا ڪيا ويا. رياست ميني سوٽا ۾ ٿيل وڏي ريلي کي خطاب ڪندي آمريڪي سينيٽر برني سينڊرز حڪومت کي به سخت تنقيد جو نشانو بنايو.
مظاهرين چيو ته آمريڪي عوام سان ايران جنگ جي حوالي سان ڪوڙ ڳالهايو پيو وڃي، انهي جنگ کي فوري طور تي روڪڻو پوندو. مظاهرين جو چوڻ هو ته ٽرمپ چونڊن ۾ وعدو ڪيو هو ته اهو جنگن تي آمريڪي عوام جي ٽيڪس جو پئسو ضايع نه ڪندو پر انهي جي ابتڙ هن ايران جي خلاف جنگ شروع ڪري ڇڏي آهي.
سينيٽر برني وڌيڪ چيو ته ايران جنگ غير آئيني آهي ڇو ته انهي جي لاءِ ڪانگريس کان اجازت به نه ورتي وئي آهي، جڏهن ته انهي تڪرار ۾ آمريڪي فوجين جي مارجي وڃڻ ۽ زخمي ٿيڻ جا واقعا به سامهون اچي رهيا آهن.
هن چيو ته انهي جنگ جي نتيجي ۾ هزارين ايراني شهري به مارجي ويا آهن جڏهن ته سوين تعليمي ادارا متاثر ٿيا. سينيٽر اسرائيلي وزيراعظم بينجمن نيتن ياهو کي به تنقيد جو نشانو بنائيندي چيو ته آمريڪا ۽ اسرائيل گڏجي خطي ۾ جنگ کي هوا ڏني. هن جو چوڻ هو ته انهي تڪرار سبب لبنان، مغربي ڪناري ۽ ٻين علائقن ۾ به انساني بحران شدت اختيار ڪري ورتو آهي.
مظاهرن جي دوران هزارين ماڻهن اينڊ دي وار ۽ نو ڪنگز جا نعرا لڳايا، جڏهن ته ڪجهه هنڌن تي اسرائيلي حڪومت جي خلاف به سخت رد عمل ڏسڻ لاءِ مليو. روسي ميڊيا موجب تل ابيب ۾ به احتجاجي مظاهرا ڪيا ويا جنهن ۾ عورتن ۽ بزرگ ماڻهن شرڪت ڪئي ۽ ايران جنگ جي خلاف آواز اٿاريو.
رپورٽن موجب آچر جي ڏينهن به آمريڪا جي مختلف رياستن ۾ وڌيڪ 3200 احتجاجي مظاهرا ٿيڻ جو امڪان آهي منتظمين جي دعويٰ آهي ته اهي آمريڪي تاريخ جا سڀني کان وڏا احتجاجي مظاهرن مان هڪ ثابت ٿي سگهن ٿا.
