ڪراچي: سنڌ اسيمبلي جي بجيٽ اجلاس دوران مخالف ڌر جي اڳواڻ علي خورشيدي سنڌ حڪومت تي سخت تنقيد ڪندي دعويٰ ڪئي ته صوبي ۾ ڪرپشن کانسواءِ ڪو به ڪم نٿو ٿئي ۽ ڪيترائي سرڪاري آفيسر ڪميشن وٺڻ کي پنهنجو حق سمجهن ٿا.
علي خورشيدي چيو ته حڪومتي ميمبر جنهن بجيٽ کي ڪامياب قرار ڏئي رهيا آهن، اها حقيقت ۾ سنڌ جي عوام کي وڌيڪ مالي خساري ڏانهن ڌڪي رهي آهي.
هن چيو ته ايم ڪيو ايم کي بار بار وفاقي حڪومت ۾ پنهنجين وزارتن تان استعيفائون ڏيڻ لاءِ چيو وڃي ٿو، پر جيڪڏهن پاڪستان پيپلز پارٽي صدر مملڪت، سينيٽ جي چيئرمين ۽ قومي اسيمبلي جي ڊپٽي اسپيڪر کان استعيفائون وٺي ته ايم ڪيو ايم جا وفاقي وزير به استعيفائون ڏيڻ لاءِ تيار آهن.
مخالف ڌر جي اڳواڻ وڌيڪ چيو ته جيڪڏهن پيپلز پارٽي مان چونڊ کٽيندڙ بااثر شخصيتون (اليڪٽيبلز) الڳ ٿي وڃن ته حڪومت قائم نه رهي سگهي. هن چيو ته اهو نه چيو وڃي ته عوام صرف ڪارڪردگي جي بنياد تي ووٽ ڏئي ٿو.
هن صوبائي وزير سعيد غني جي بيان جو حوالو ڏيندي چيو ته جيڪڏهن چيو وڃي ٿو ته لاهور ۾ ايم ڪيو ايم نه هجڻ سبب امن آهي، ته پوءِ هو به چون ٿا ته لاهور ۾ پيپلز پارٽي نه هجڻ سبب امن آهي. هن سوال ڪيو ته ڪچي وارن علائقن ۾، جتي بدامني جا واقعا ٿين ٿا، اتي آخر ايم ڪيو ايم ڪٿي موجود آهي؟
علي خورشيدي مطالبو ڪيو ته ننڍن گريڊن جي سرڪاري ملازمن جي پگهارن ۾ گهٽ ۾ گهٽ 20 سيڪڙو واڌ ڪئي وڃي ۽ سنڌ پوليس جي سپاهين جون پگهارون پنجاب پوليس جي برابر ڪيون وڃن. هن مختلف سرڪاري کاتن جي رٽائرڊ ملازمن جي پينشن جا مسئلا جلد حل ڪرڻ تي پڻ زور ڏنو.
هن چيو ته سنڌ جا ماڻهو ڄاڻڻ چاهين ٿا ته گل پلازه سانحو ڪيئن پيش آيو، تنهن ڪري ان واقعي بابت جاچ ڪميشن جي رپورٽ عوام آڏو آندي وڃي.
ٻئي طرف سنڌ جي اڳوڻي وڏي وزير قائم علي شاهه بجيٽ تي ڳالهائيندي چيو ته ڏکين معاشي حالتن ۾ متوازن بجيٽ پيش ڪرڻ ڪو آسان ڪم نه هوندو آهي.
هن چيو ته ڪراچي ۾ ڪيترائي ترقياتي ڪم ڪيا ويا آهن. سندس چوڻ هو ته مخالف ڌر ڀلي انهن منصوبن کي تسليم نه ڪري، پر عوام انهن ترقياتي ڪمن کان واقف آهي.
قائم علي شاهه دعويٰ ڪئي ته گذريل 18 سالن دوران سنڌ ۾ تاريخي نوعيت جا ڪيترائي ترقياتي ڪم ٿيا آهن ۽ پيپلز پارٽي جي ڪارڪردگي نمايان رهي آهي.
هن وڌيڪ چيو ته صوبن کي اين ايف سي ايوارڊ جي مڪمل حقن جي ضرورت آهي، ڇاڪاڻ ته ڪيترائي وفاقي کاتا اڃا تائين مرڪز وٽ آهن. سندس چوڻ هو ته صدر آصف علي زرداري 2010ع ۾ اين ايف سي ايوارڊ تي عملدرآمد کي يقيني بڻايو هو، ۽ پيپلز پارٽي ڌمڪين کان نه ڊڄندي.
