اسلام آباد: ملڪ ۾ دهشتگردي جي تازي واقعن کان پوءِ پاڪستان افغان صوبا پڪتيا، پڪتيڪا ۽ ڪنڙ ۾ ڪارروايون ڪندي 25 دهشتگردن کي مارڻ جي دعويٰ ڪئي آهي.
وفاقي اطلاعات واري وزير عطا تارڙ سماجي رابطن واري ويب سائيٽ ايڪس تي جاري ڪيل بيان ۾ چيو ته سرحدي علائقن ۾ جماعت الاحرار ۽ فتنہ الخوارج جي ٺڪاڻن خلاف ڪارروايون ڪيون ويون.
هن موجب پاڪ-افغان سرحد تي سيڪيورٽي فورسن انٽيليجنس بنيادن تي آپريشن ڪيو، جنهن دوران مجموعي طور فتنہ الخوارج جا 29 ڪارندا مارجي ويا.
عطا تارڙ وڌيڪ ٻڌايو ته 28 جون تي سيڪيورٽي فورسن باجوڙ ۾ به هڪ آپريشن ڪيو، جنهن دوران خارجي ڪمانڊر خان فروش عرف زابل سميت ٽي دهشتگرد مارجي ويا.
وفاقي وزير موجب مارجي ويل دهشتگردن جو تعلق ڀارتي پراڪسي تنظيم جماعت الاحرار سان هو.
هن وڌيڪ چيو ته افغان صوبا پڪتيا، پڪتيڪا ۽ ڪنڙ ۾ پڻ ڪارروايون ڪيون ويون، جتي 25 دهشتگرد مارجي ويا، جڏهن ته دهشتگردن جي ٺڪاڻن تي موجود وڏي مقدار ۾ هٿيار ۽ گولا بارود پڻ تباهه ڪيو ويو.
