ڪراچي: پاڪستان جي موسميات کاتي سڄي ملڪ ۾ جولاءِ جي پهرين هفتي دوران مون سون برساتن جي اڳڪٿي ڪندي مختلف علائقن ۾ تيز هوائن، گجگوڙ، شهري ٻوڏ (اربن فلڊنگ) ۽ لينڊ سلائيڊنگ بابت خبردار ڪيو آهي.
موسميات کاتي موجب 30 جون جي شام يا رات کان اولهه طرفان هوائن جو هڪ سلسلو ملڪ ۾ داخل ٿيڻ جو امڪان آهي، جڏهن ته عرب سمنڊ مان ايندڙ نمي واريون هوائون ملڪ جي اوڀر ۽ وچ وارن علائقن ۾ داخل ٿي رهيون آهن. ان کان علاوه 2 جولاءِ کان خليج بنگال مان ايندڙ نمي واريون هوائون به ملڪ جي اترين علائقن ڏانهن وڌنديون.
کاتي جي اڳڪٿي موجب پهرين جولاءِ کان 6 جولاءِ تائين ڪشمير، پنجاب، خيبرپختونخوا، گلگت بلتستان ۽ اسلام آباد سميت مختلف علائقن ۾ تيز هوائن ۽ گجگوڙ سان گڏ برساتن جو امڪان آهي.
موسميات کاتي وڌيڪ ٻڌايو ته 3 ۽ 4 جولاءِ تي سنڌ جي شهرن سکر، جيڪب آباد، لاڙڪاڻو ۽ ڀرپاسي وارن ضلعن ۾ پڻ برسات جو امڪان آهي، جڏهن ته پهرين کان 4 جولاءِ تائين بلوچستان جي اتر ۽ اتر اوڀر وارن ضلعن ۾ به برساتون پوڻ جي اڳڪٿي ڪئي وئي آهي.
موسميات کاتي خبردار ڪيو آهي ته 2 کان 6 جولاءِ دوران مٿئين خيبرپختونخوا، گلگت بلتستان، مري، گليات ۽ ڪشمير جي جبلائي علائقن ۾ لينڊ سلائيڊنگ جا امڪان موجود آهن، تنهن ڪري لاڳاپيل ادارا ۽ رهواسي احتياط ڪن.
ان کان علاوه پهرين کان 4 جولاءِ تائين اسلام آباد، راولپنڊي، پشاور، گوجرانواله، لاهور ۽ فيصل آباد ۾ تيز برساتن سبب شهري ٻوڏ (اربن فلڊنگ) جو به خدشو ظاهر ڪيو ويو آهي.
موسميات کاتي عوام، ضلعي انتظاميا ۽ لاڳاپيل ادارن کي هدايت ڪئي آهي ته هو امڪاني خراب موسمي حالتن کي نظر ۾ رکندي اڳواٽ حفاظتي اپاءَ وٺن، غيرضروري سفر کان پاسو ڪن ۽ هنگامي صورتحال کي منهن ڏيڻ لاءِ تيار رهن.
