ڪراچي: سنڌي اسٽوڊنٽس آرگنائيزيشن (ايس ايس او) جي اهتمام هيٺ سچل آرڪيڊ ۾ “جديد ٽيڪنالاجي جو نوجوانن جي ترقي ۽ مستقبل سنوارڻ ۾ ڪردار” جي عنوان سان هڪ فڪري ليڪچر منعقد ڪيو ويو، جنهن کي محمد علي ابڙو خطاب ڪيو. تقريب ۾ شاگردن، نوجوانن ۽ مختلف شعبن سان لاڳاپيل ماڻهن وڏي انگ ۾ شرڪت ڪئي.
محمد علي ابڙو پنهنجي خطاب ۾ چيو ته جديد ٽيڪنالاجي ۽ خاص طور مصنوعي ذهانت (Artificial Intelligence – AI) نوجوانن جي مستقبل لاءِ بيشمار نوان موقعا پيدا ڪري رهي آهي. هن چيو ته اڄ جي دور ۾ ٽيڪنالاجي رڳو سهولتن جو ذريعو نه رهي آهي، پر اها تعليم، روزگار، تحقيق، ڪاروبار ۽ سماجي ترقي جو اهم بنياد بڻجي چڪي آهي.
هن چيو ته اڄ جو نوجوان صرف روايتي تعليم تائين محدود نه رهيو آهي، پر جديد ڊجيٽل اوزارن ۽ آن لائن وسيلن ذريعي دنيا جي ڪنهن به ڪنڊ ۾ موجود علم، مهارتن ۽ روزگار جي موقعن تائين آساني سان پهچي سگهي ٿو. هن زور ڏنو ته موجوده دور ۾ صرف ڊگري حاصل ڪرڻ ڪاميابي جي ضمانت ناهي، پر ان سان گڏ ڊجيٽل مهارتون، تخليقي سوچ، مسئلا حل ڪرڻ جي صلاحيت ۽ مسلسل سکڻ جو جذبو به لازمي آهي.
محمد علي ابڙو چيو ته فري لانسنگ، آن لائن تعليم، ڊجيٽل مارڪيٽنگ، سافٽ ويئر ڊولپمينٽ، ويب ڊزائننگ، گرافڪ ڊيزائننگ ۽ ٻين جديد شعبن نوجوانن لاءِ روزگار جا نوان در کوليا آهن، جتي هو پنهنجي قابليت جي بنياد تي عالمي سطح تي ڪم ڪري سگهن ٿا.
مصنوعي ذهانت (AI) بابت ڳالهائيندي هن چيو ته هي ٽيڪنالاجي تعليم، صحت، تحقيق، زراعت، صنعت ۽ ٻين ڪيترن ئي شعبن ۾ انقلاب آڻي رهي آهي. هن چيو ته AI انساني صلاحيتن کي وڌائڻ ۽ ڪم کي وڌيڪ تيز ۽ مؤثر بڻائڻ جو اهم ذريعو آهي، پر ان جو استعمال ذميواري، اخلاقي قدرن ۽ مثبت مقصدن تحت ٿيڻ گهرجي.
هن وڌيڪ چيو ته ايندڙ دور انهن نوجوانن جو هوندو، جيڪي صرف ٽيڪنالاجي استعمال ڪرڻ تائين محدود نه رهندا، پر ان جي بنيادي ڄاڻ حاصل ڪري، نيون مهارتون سکندا ۽ ان کي پنهنجي سماج ۽ ملڪ جي ترقي لاءِ ڪارائتي نموني استعمال ڪندا.
محمد علي ابڙو ان ڳالهه تي به زور ڏنو ته ٽيڪنالاجي پاڻ ۾ ڪاميابي نه آهي، پر ان جو صحيح، ذميواراڻو ۽ تخليقي استعمال ئي انسان کي ڪاميابي ڏانهن وٺي وڃي ٿو. هن چيو ته جيڪي قومون پنهنجي نوجوانن کي جديد علم، ڊجيٽل مهارتن ۽ بدلجندڙ عالمي ضرورتن مطابق تيار ڪنديون، مستقبل انهن جو هوندو.
تقريب دوران شرڪت ڪندڙن جديد ٽيڪنالاجي، مصنوعي ذهانت، آن لائن روزگار ۽ مستقبل جي چئلينجن بابت مختلف سوال پڇيا، جن جا محمد علي ابڙو تفصيلي جواب ڏنا. سوال جواب واري سيشن ۾ نوجوانن وڏي دلچسپي جو اظهار ڪيو.
ان موقعي تي ذوالفقار ابڙو، گلاب راءِ، دسرت آنباڻي، مهيش، وريندر، راجا نند چيلاڻي، پرشوتم ۽ ٻين دوستن پڻ شرڪت ڪئي. تقريب جي پڄاڻي تي نوجوانن کي جديد ٽيڪنالاجي سکڻ، ڊجيٽل مهارتن ۾ اضافو ڪرڻ ۽ پنهنجي صلاحيتن کي مثبت رخ ۾ استعمال ڪرڻ جي تلقين ڪئي وئي.
