راڻيپور (ساجد): راڻيپور شهر مان گذرندڙ قومي شاهراهه تي قائم غيرقانوني انڪروچمينٽ خلاف ضلعي انتظاميا وڏي پيماني تي گڏيل آپريشن ڪندي شاهراهه جي ٻنهي پاسن تان قبضا، عارضي اڏاوتون ۽ ٽريفڪ جي رواني ۾ رڪاوٽ بڻيل سامان هٽائي ڇڏيو.
هي ڪارروائي اسسٽنٽ ڪمشنر سوڀوديرو شاهه محمد چانگ جي اڳواڻي ۾ ڪئي وئي، جنهن ۾ ٽائون آفيسر جهانزيب مڱڻيجو، مختيارڪار وقار شيخ، پوليس، موٽروي پوليس ۽ ٽائون ڪاميٽي جي عملي گڏيل طور حصو ورتو.
آپريشن دوران قومي شاهراهه جي ٻنهي ڪنارن تي قائم غيرقانوني قبضا، دڪانن آڏو رکيل سامان، عارضي شيڊ، اسٽال ۽ ٽريفڪ جي وهڪري ۾ رڪاوٽ بڻيل ٻين شين کي هٽايو ويو. ٽائون ڪاميٽي جي عملي ڳري مشينري جي مدد سان انڪروچمينٽ ختم ڪرائي، جڏهن ته پوليس ڪنهن به اڻ وڻندڙ صورتحال کان بچڻ لاءِ سخت حفاظتي انتظام سنڀاليا.
ضلعي انتظاميا موجب قومي شاهراهه تي وڌندڙ غيرقانوني قبضا نه رڳو ٽريفڪ جي رواني کي متاثر ڪري رهيا هئا، پر روڊ استعمال ڪندڙن لاءِ حادثن جو سبب پڻ بڻجي رهيا هئا. انتظاميا جو چوڻ آهي ته عوام جي جان ۽ مال جي تحفظ ۽ شاهراهه تي بنا رڪاوٽ ٽريفڪ جي رواني کي يقيني بڻائڻ لاءِ اها مهم شروع ڪئي وئي آهي.
اسسٽنٽ ڪمشنر سوڀوديرو شاهه محمد چانگ چيو ته سرڪاري زمينن، قومي شاهراهه ۽ ٻين عوامي هنڌن تي ڪنهن به قسم جي غيرقانوني قبضي يا انڪروچمينٽ جي اجازت نه ڏني ويندي. هن واپارين، دڪاندارن ۽ شهرين کي اپيل ڪئي ته هو رضاڪارانه طور سرڪاري حدن اندر قائم غيرقانوني قبضا ختم ڪن، ٻي صورت ۾ قانون موجب سخت ڪارروائي ڪئي ويندي.
هن وڌيڪ چيو ته ضلعي انتظاميا جو مقصد ڪنهن سان زيادتي ڪرڻ نه، پر قانون تي عملدرآمد، ٽريفڪ جي بهتر وهڪري ۽ شهرين کي محفوظ سفري سهولتون فراهم ڪرڻ آهي.
ضلعي انتظاميا موجب قومي شاهراهه سميت ٻين سرڪاري هنڌن تان انڪروچمينٽ ختم ڪرڻ لاءِ اهڙا آپريشن مستقبل ۾ به بنا ڪنهن امتياز جي جاري رکيا ويندا، جيئن شهر ۾ ٽريفڪ جو نظام وڌيڪ بهتر بڻائي سگهجي ۽ عوام کي محفوظ، آسان ۽ بنا رڪاوٽ آمدرفت جون سهولتون فراهم ٿي سگهن.
