حيدرآباد (رپورٽ: محبوب حسين بوزدار): ايس ايس پي حيدرآباد شہزيب چاچر سوشل ميڊيا تي ٿاڻي بلديه سان منسوب هڪ پوليس اهلڪار جي وائرل ٿيل وڊيو جو فوري نوٽيس وٺندي واقعي جي شفاف ۽ غيرجانبدارانه جاچ جو حڪم ڏئي ڇڏيو آهي.
ضلع پوليس حيدرآباد جي ترجمان موجب، ايس ايس پي جي هدايت تي لاڳاپيل پوليس اهلڪار کي فوري طور ڪوارٽر گارڊ ڪيو ويو آهي، جڏهن ته واقعي جي جاچ ڊي ايس پي بلديه ظهور احمد سومرو حوالي ڪئي وئي آهي.
ترجمان موجب ڊي ايس پي بلديه کي هدايت ڪئي وئي آهي ته وڊيو ۾ سامهون آيل سمورن پهلوئن جو بارڪي سان جائزو وٺي جلد کان جلد پنهنجي جاچ رپورٽ پيش ڪئي وڃي، جيئن حقيقتون سامهون اچي سگهن.
ايس ايس پي حيدرآباد واضح ڪيو آهي ته جيڪڏهن جاچ دوران لاڳاپيل پوليس اهلڪار خلاف لڳايل الزام درست ثابت ٿيا ته سندس خلاف بنا ڪنهن امتياز جي کاتيواري توڙي قانوني ڪارروائي ڪئي ويندي.
هن وڌيڪ چيو ته حيدرآباد پوليس قانون جي بالادستي، شفافيت ۽ احتساب جي اصولن تي مڪمل يقين رکي ٿي، ۽ ڪنهن به پوليس آفيسر يا اهلڪار طرفان غيرقانوني يا غيرپيشاورانه رويي کي ڪنهن به صورت ۾ برداشت نه ڪيو ويندو.
ضلع پوليس جي ترجمان موجب جاچ مڪمل ٿيڻ کان پوءِ رپورٽ جي بنياد تي وڌيڪ ڪارروائي ڪئي ويندي، جڏهن ته پوليس کاتي پنهنجي اندر احتساب جي عمل کي يقيني بڻائڻ لاءِ پرعزم آهي.
