سانگهڙ ڊپٽي ڪمشنر سانگهڙ ساره جاويد جي صدارت هيٺ هڪ اجلاس منعقد ڪيو ويو،

جنهن ۾ ضلعي اندر ڪرسمس جي ڏهاڙي کي پرامن ۽ محفوظ بڻائڻ لاءِ پوليس، ضلعي انتظاميه، ريسڪيو ادارن ۽ ٻين لاڳاپيل کاتن جي آفيسرن شرڪت ڪئي۔
اجلاس کي خطاب ڪندي ڊپٽي ڪمشنر چيو ته ڪرسمس جي موقعي تي گرجا گهرن سميت ٻين عبادتگاهن ۽ عوامي هنڌن تي فول پروف سيڪيورٽي انتظامن کي يقيني بڻايو وڃي۔ پوليس کي گشت وڌائڻ، اندروني ۽ بيروني رستن تي سخت نگراني ۽ شڪي سرگرمين تي ڪڙي نظر رکڻ جون هدايتون ڏنيون ويون۔
اجلاس دوران ٽريفڪ مينيجمينٽ، ايمرجنسي رسپانس ۽ طبي سهولتن جي فراهمي بابت به تفصيلي جائزو ورتو ويو۔ ڊي سي واضح ڪيو ته عوام جي جان ۽ مال جو تحفظ ضلعي انتظاميا جي اولين ترجيح آهي ۽ ڪنهن به قسم جي ڪوتاهي برداشت نه ڪئي ويندي۔ آخر ۾ سڀني کاتن کي گڏيل سهڪار سان پنهنجا فرض سرانجام ڏيڻ ۽ ڪرسمس کي خوشگوار ماحول ۾ ملهائڻ لاءِ مؤثر قدم کڻڻ جون هدايتون ڏنيون ويون۔ گڏجاڻي بعد ڪرسمس ڪيڪ پڻ ڪٽيو ويو.