لاهور: پنجاب جي وڏي وزير مريم نواز چيو آهي ته سرگوڌا ۾ 7 ورهين جي نينگري سان پيش آيل مبينا زيادتي جو واقعو انتهائي دل ڏاريندڙ آهي. هن چيو ته اهڙن واقعن جي روڪٿام حڪومت جي ذميواري ضرور آهي، پر والدين کي به گهرجي ته ننڍڙن ٻارن کي اڪيلو ٻاهر نه موڪلين.
لاهور ۾ پيغامِ امن ڪميٽي جي اجلاس کي خطاب ڪندي مريم نواز چيو ته معاشري ۾ وڌندڙ سماجي مسئلن تي سنجيدگي سان غور ڪرڻ جي ضرورت آهي. سندس چوڻ هو ته اهو پڻ ڏسڻو پوندو ته ماڻهو پنهنجي پٽن ۽ مردن جي ڪهڙي نموني تربيت ڪري رهيا آهن، ڇو ته سماج جي بهتري لاءِ سٺي اخلاقي تربيت انتهائي اهم آهي.
هن چيو ته سرگوڌا ۾ پيش آيل واقعي نينگري ۽ سندس خاندان سان گڏ سموري معاشري کي ڏک پهچايو آهي. هن واقعي کي انتهائي افسوسناڪ قرار ڏيندي چيو ته حڪومت اهڙن ڏوهن جي روڪٿام ۽ متاثرن کي انصاف فراهم ڪرڻ لاءِ پنهنجون ذميواريون نڀائيندي.
وڏي وزير چيو ته حڪومت جي ذميواري آهي ته شهرين جي جان ۽ مال جي حفاظت کي يقيني بڻائي، پر والدين کي به احتياط ڪرڻ گهرجي ۽ خاص طور ننڍڙن ٻارن کي اڪيلو ٻاهر موڪلڻ کان پاسو ڪرڻ گهرجي، جيئن ڪنهن به امڪاني خطري کان بچي سگهجي.
مريم نواز سماج جي اخلاقي تربيت تي زور ڏيندي چيو ته حڪومت هر گهر تائين پهچي نٿي سگهي، تنهن ڪري سماجي برائين جي خاتمي لاءِ والدين، استادن، مذهبي اڳواڻن ۽ سماج جي سڀني فردن کي گڏجي پنهنجو ڪردار ادا ڪرڻو پوندو.
هن وڌيڪ چيو ته جڏهن به ڪنهن گٽر ۾ ڪري ڪنهن ٻار جي موت جي خبر ملي ٿي ته هوءَ ان کي پنهنجي ذميواري سمجهي ٿي ۽ اهڙن واقعن سبب کيس ڪيترين راتين تائين ننڊ نٿي اچي. هن چيو ته حڪومت ۽ انتظاميا گٽرن جا ڍڪ لڳائين ٿيون، پر ڪجهه ماڻهو اهي ڍڪ چوري ڪري وٺن ٿا، جنهن سبب وري اهڙا حادثا پيش اچن ٿا.
پنهنجي خطاب دوران وڏي وزير ملڪ ۾ امن ۽ مذهبي هم آهنگي جي فروغ لاءِ عالمن جي ڪردار کي اهم قرار ڏنو. هن چيو ته معاشري ۾ امن، برداشت ۽ ڀائيچاري کي هٿي ڏيڻ لاءِ مذهبي اڳواڻن جو ڪردار انتهائي اهم آهي.
مريم نواز پنهنجي خطاب ۾ وزيراعظم شهباز شريف، فيلڊ مارشل سيد عاصم منير ۽ نائب وزيراعظم جي ڪردار کي به ساراهيو ۽ چيو ته علائقائي معاملن ۽ ايران ۽ آمريڪا وچ ۾ مفاهمت لاءِ پاڪستاني قيادت جون سفارتي ڪوششون قابلِ تعريف آهن.
هن آخر ۾ چيو ته حڪومت امن، قانون جي حڪمراني، سماجي سڌارن ۽ شهرين جي تحفظ لاءِ پنهنجون ڪوششون جاري رکندي، جڏهن ته والدين ۽ سماج کي به پنهنجي ذميوارين جو احساس ڪندي ٻارن جي حفاظت، بهتر تربيت ۽ محفوظ ماحول جي فراهمي لاءِ گڏيل ڪردار ادا ڪرڻو پوندو.
