سکر جي علائقي صالح پٽ جي ڳوٺ دولت شاهه جا رهواسي، شنمباني برادري سان تعلق رکندڙ مرد ۽ عورتون، پنهنجي ئي بااثر برادري جي ماڻهن طرفان نوجوان جي بي رحماڻي قتل ۽ ان کانپوءِ پوليس طرفان مظاهرين خلاف ڪيس داخل ڪرڻ خلاف سکر پريس ڪلب اڳيان احتجاجي مظاهرو ڪيو۔
مظاهرين ۾ عزيز الله شنمباني، ڀٽائي ڊنو، مالڪ ڊنو، ڪريمان خاتون سميت ٻيا ماڻهو شامل هئا۔
مظاهرين ميڊيا سان ڳالهائيندي ٻڌايو ته چار ڏينهن اڳ سندن نوجوان ڀاءُ عبدالمجيد شنمباني کي بااثر جوابدار غلام نبي شنمباني، ارشاد شنمباني، يعقوب شنمباني ۽ محمد نواز پسٽل جا فائر ڪري بي رحمي سان قتل ڪيو۔
واقعي کانپوءِ پوليس ٻه جوابدار، غلام نبي ۽ ارشاد، گرفتار ڪري ورتا، جڏهن ته ٻيا نامزد جوابدار اڃا تائين فرار آهن۔
مظاهرين جو چوڻ هو ته جڏهن فرار جوابدارن جي گرفتاري لاءِ صالح پٽ ٿاڻي اڳيان احتجاج ڪيو ويو ته پوليس انصاف فراهم ڪرڻ بدران الٽو مظاهرين خلاف ئي ڪيس داخل ڪري ڇڏيو۔
هنن الزام لڳايو ته پوليس ڪجهه جوابدارن سان ملي ڀڳت ڪري کين ڌمڪيون ڏئي رهي آهي، جڏهن ته جوابدارن طرفان به ڪيس واپس وٺڻ ۽ جان ليوا ڌمڪيون ڏنيون پيون وڃن۔
احتجاج ڪندڙن چيف جسٽس آف پاڪستان، وزيراعليٰ سنڌ، آءِ جي سنڌ، ڊي آءِ جي سکر ۽ ايس ايس پي سکر کان زور ڀريو مطالبو ڪيو ته قتل ۾ ملوث سڀني جوابدارن کي فوري طور گرفتار ڪري قانون موجب ڪڙي سزا ڏني وڃي، مظاهرين خلاف بنا جواز داخل ڪيل ڪيس ختم ڪيو وڃي، ۽ ان ڪارروائي ۾ ملوث پوليس آفيسرن ۽ اهلڪارن خلاف کاتي واري ڪارروائي ڪئي وڃي۔
هنن وڌيڪ مطالبو ڪيو ته واقعي جي صاف ۽ شفاف جاچ ڪرائي متاثر خاندان کي تحفظ ۽ انصاف فراهم ڪيو وڃي، ٻي صورت ۾ احتجاج جو دائرو وڌايو ويندو۔
