استنبول: وزيراعظم شهباز شريف ايران جي دوري کانپوءِ ترڪي جي دوري لاءِ استنبول پهچي ويو، جتي هو ترڪي جي صدر رجب طيب اردوان جي دعوت تي سرڪاري دورو ڪري رهيو آهي.
وزيراعظم سان گڏ نائب وزيراعظم اسحاق ڊار ۽ وفاقي وزير اطلاعات و نشريات عطا الله تارڙ پڻ موجود آهن.
استنبول ايئرپورٽ تي ترڪي جي واپار واري وزير پروفيسر ڊاڪٽر عمر بولات وزيراعظم جو استقبال ڪيو. ان موقعي تي ترڪي ۾ پاڪستان جو سفير ڊاڪٽر يوسف جنيد ۽ ترڪي جي پرڏيهي وزارت جا اعليٰ عملدار پڻ موجود هئا.
وزيراعظم هائوس پاران جاري ڪيل بيان موجب، وزيراعظم شهباز شريف ۽ صدر رجب طيب اردوان ٻطرفن لاڳاپن جي سمورن شعبن تي تفصيلي ڳالهيون ڪندا. ملاقات دوران خاص طور تي واپار، سيڙپڪاري ۽ اقتصادي سهڪار کي وڌيڪ هٿي ڏيڻ تي ڌيان ڏنو ويندو.
ٻئي اڳواڻ علائقائي امن ۽ سلامتي سان لاڳاپيل معاملن تي پڻ خيالن جي ڏي وٺ ڪندا.
وزيراعظم شهباز شريف استنبول ۾ هڪ بزنس ڪانفرنس کي به خطاب ڪندو، جنهن ۾ خاص اقتصادي زونز، توانائي، آءِ ٽي، نجڪاري ۽ ٻين شعبن ۾ سيڙپڪاري جا موقعا اجاگر ڪيا ويندا.
هن ڪانفرنس ۾ ترڪي جا ڪاروباري اڳواڻ، سيڙپڪار ۽ اعليٰ سرڪاري عملدار شرڪت ڪندا.
ايران ۾ تعزيتي تقريب ۾ شرڪت
ترڪي روانگي کان اڳ وزيراعظم شهباز شريف تهران پهتو، جتي هن ايراني سپريم ليڊر جي تعزيتي اجتماع ۾ پاڪستاني اعليٰ سطحي وفد جي اڳواڻي ڪندي شرڪت ڪئي.
وفد ۾ نائب وزيراعظم اسحاق ڊار، فيلڊ مارشل عاصم منير، وفاقي وزير داخلا محسن نقوي، وفاقي وزير اطلاعات عطا الله تارڙ، بلاول ڀٽو زرداري ۽ ٻيا اعليٰ عملدار شامل هئا.
وزيراعظم، فيلڊ مارشل ۽ وفد جي ٻين ميمبرن فاتحه خواني ڪئي ۽ مرحوم اڳواڻ جي خدمتن کي ڀيٽا پيش ڪئي.
وزيراعظم چيو ته ايراني سپريم ليڊر ڪيترن ئي ڏهاڪن تائين بصيرت، حڪمت ۽ دور انديشي سان ايراني قوم جي رهنمائي ڪئي ۽ سندس خدمتون هميشه ياد رکيون وينديون.
