پنجاب مان مبينه طور تي 45 لک ٽن ڪڻڪ جي غائب ٿيڻ جو انڪشاف ٿيو آهي جڏهن ته سنڌ مان به 6 لک ٽن ڪڻڪ جي رڪارڊ مان غائب ٿيڻ جو معاملو سامهون اچي ويو آهي.
ڪڻڪ بحران جي جاچ نه ٿئي ته درآمدي بل هڪ ارب ڊالر تائين پهچڻ جو امڪان آهي جنهن تي ڪڻڪ جي بحران ۽ امڪاني ذخيره اندوزي جي حوالي سان سوال اٿڻ لڳا آهن.
ذريعن موجب پنجاب مان ڪڻڪ غائب ٿيڻ جو انڪشاف هڪ اعليٰ سطحي اجلاس ۾ ٿيو جنهن ۾ پنجاب جي آفيسرن ٻين صوبن کان پڇا ڪئي ته اها ڪڻڪ انهن جي صوبن ۾ منتقل ٿي آهي جڏهن ته ٻين صوبن لاعلمي جو اظهار ڪندي خدشو ظاهر ڪيو ته ڪڻڪ ذخيره اندوزي جو شڪار ٿي هوندي.
ذريعن موجب حڪومت ڪڻڪ جي امدادي قيمت 3500 روپيه في مڻ مقرر ڪئي هئي جنهن سبب نجي شعبي ڪڻڪ جي خريداري ۾ دلچسپي نه ورتي. پنجاب حڪومت نجي شعبي کي سهولت فراهم ڪندي ڪڻڪ خريد ڪرڻ جي ترغيب ڏني، پر نجي شعبي ڪڻڪ جي خريداري لاءِ بينڪن کان قرض ڏيارڻ جو مطالبو ڪيو.
سيزن جي شروعات ۾ سنڌ ۽ خيبرپختونخواهه ۾ ڪڻڪ جي قيمت 4500 روپيه في مڻ تائين پهچي وئي. جڏهن ته ذخيره اندوزن هارين کان ٽيڪس ۽ پرمٽ کان سواءِ ڪڻڪ خريد ڪري ذخيرو ڪري ورتي. ماهرن موجب پنجاب ۾ گذريل ٻن، ٽن سالن کان اهڙي پاليسي اختيار ڪئي پئي وڃي جنهن جي تحت سرڪاري خريداري جي بجاءِ نجي شعبي کي ڪڻڪ خريد ڪرڻي هئي.
