ڪراچي: شهر جي مختلف علائقن مان 5 نشي جي عادي ماڻهن جون لاشون هٿ آيون آهن، جنهن کانپوءِ علائقي ۾ ڳڻتي جي لهر ڇائنجي وئي آهي۔
ريسڪيو اختيارين موجب گارڊن، رنڇوڙ لائين، نمائش، قيوم آباد پل ۽ سهراب ڳوٺ مان انهن ماڻهن جون لاشون مليون آهن۔ سڀئي لاشون روڊ جي ڪناري کان هٿ آيون آهن، جن کي ضروري قانوني ڪارروائي لاءِ اسپتال منتقل ڪيو ويو آهي۔
اختيارين جو چوڻ آهي ته ابتدائي طور تي اهي سڀئي ماڻهو نشي جا عادي لڳن ٿا، جڏهن ته اصل سبب معلوم ڪرڻ لاءِ جاچ جاري آهي۔
ٻئي پاسي موسميات کاتي موجب ڪراچي ۾ گرمي جي شدت ۾ اضافو ٿي رهيو آهي۔ اڄ وڌ ۾ وڌ گرمي پد 38.5 ڊگري سينٽي گريڊ رڪارڊ ڪيو ويو آهي۔
موسميات کاتي خبردار ڪيو آهي ته ايندڙ ڏينهن ۾ گرمي وڌيڪ وڌي سگهي ٿي۔ آچر تي گرمي پد 40 ڊگري تائين ۽ سومر تي 41 ڊگري سينٽي گريڊ تائين پهچڻ جو امڪان آهي۔ ان دوران موسم گرم ۽ خشڪ رهڻ جي اڳڪٿي ڪئي وئي آهي۔
ماهرن شهرين کي صلاح ڏني آهي ته هو سخت گرمي دوران احتياط ڪن، خاص طور تي ڏينهن جي وقت غير ضروري ٻاهر نڪرڻ کان پاسو ڪن ۽ پاڻي جو استعمال وڌائين۔
