صنعتڪار سيپا جي قانونن تي مڪمل عملدرآمد يقيني بڻائين، جلد آگاهي سيمين ٽيار منعقد ڪيو ويندو: سينيئر وائيس چيئرمين عامر شاهه

حيدرآباد: سنڌ انوائرنمينٽل پروٽيڪشن ايجنسي (SEPA) ريجنل آفيس حيدرآباد جي ڊپٽي ڊائريڪٽر (ٽيڪنيڪل) ۽ انچارج جناب علي نواز ڀمڀرو اڄ پنهنجي ٽيم سان گڏ حيدرآباد سائيٽ ايريا جو دورو ڪيو. ان موقعي تي حيدرآباد سائيٽ ايسوسيئيشن آف ٽريڊ اينڊ انڊسٽري جي سينيئر وائيس چيئرمين جناب عامر شاهه کين ايسوسيئيشن جي ڪيمپ آفيس اچڻ جي دعوت ڏني، جيڪا هنن قبول ڪئي ۽ پنهنجي ٽيم سان گڏ ڪيمپ آفيس جو دورو ڪيو.
سينيئر وائيس چيئرمين جناب عامر شاهه، وائيس چيئرمين جناب ايسر ڪمار، جنرل سيڪريٽري جناب شاهد قائمخاني، مينيجنگ ڪميٽي جي ميمبر جناب شريف پنجواڻي ۽ ايسوسيئيشن جي ٻين عهديدارن سيپا جي ڊپٽي ڊائريڪٽر ۽ سندس ٽيم کي ڪيمپ آفيس ۾ ڀليڪار ڪيو.
ان موقعي تي جناب علي نواز ڀمڀرو صنعتڪارن ۽ ايسوسيئيشن جي ميمبرن کي ٻڌايو ته سيپا جي ماحولياتي قانونن ۽ ضابطن تي عمل ڪرڻ هر صنعت لاءِ ضروري آهي. هن چيو ته جيڪي صنعتون قانون تي عمل نه ڪنديون، انهن خلاف قانون موجب ڪارروائي ڪئي ويندي.
سينيئر وائيس چيئرمين جناب عامر شاهه چيو ته سائيٽ ايريا ۾ ڪم ڪندڙ سمورين صنعتن لاءِ سيپا جي ماحولياتي قانونن ۽ ضابطن تي عملدرآمد يقيني بڻائڻ ضروري آهي. هن چيو ته اڪثر صنعتون سيپا جي قانونن تحت گهربل قدمن تي عمل ڪري رهيون آهن، جڏهن ته ڪجهه صنعتن جا معمولي نوعيت جا معاملا رهيل آهن، جن کي پڻ جلد مڪمل ڪيو ويندو.
جناب عامر شاهه وڌيڪ چيو ته ماضي ۾ به ايسوسيئيشن طرفان صنعتڪارن ۽ ميمبرن لاءِ باقاعدگي سان آگاهي پروگرام منعقد ڪيا ويندا رهيا آهن، جن ۾ سيپا جا نمائندا پڻ شرڪت ڪندا هئا. انهن پروگرامن دوران ماحولياتي قانونن ۽ صنعتڪارن جي ذميوارين بابت تفصيلي آگاهي ڏني ويندي هئي.
ملاقات دوران سيپا جي نمائندن جي سهڪار سان صنعتڪارن ۽ ايسوسيئيشن جي ميمبرن لاءِ هڪ ڏينهن جو آگاهي سيمينار منعقد ڪرڻ تي پڻ اتفاق ڪيو ويو. سيمينار ۾ سيپا جا آفيسر صنعتڪارن کي ماحولياتي قانونن، انهن تي عملدرآمد جي گهرجن ۽ تازين قانوني ۽ ٽيڪنيڪل تبديلين بابت آگاهي فراهم ڪندا.
جناب علي نواز ڀمڀرو صنعتڪارن ۾ ماحولياتي قانونن بابت آگاهي پيدا ڪرڻ لاءِ ايسوسيئيشن جي ڪوششن کي ساراهيو ۽ چيو ته سيپا طرفان صنعتن کي ماحولياتي قانونن تي عمل ڪرڻ لاءِ فني ۽ قانوني سهڪار فراهم ڪرڻ لاءِ هر ممڪن مدد ڪئي ويندي.