سانگهڙ: ڊاڪٽرن جي مبينا غفلت، 10 مهينن جي ٻارڙي فوت

سانگهڙ ضلعي هيڊ ڪوارٽر اسپتال ۾ ڊاڪٽرن جي مبينا غفلت سبب ڏهه مهينن جي ٻارڙي فوت ٿي وئي. وارثن پريس ان ڪلب جي سامهون لاش رکي احتجاج ڪيو. ڊي ايڇ او ڊاڪٽر فاروق آرائين واقعي جو نوٽيس ورتو. انڪوائري ڪميٽي ٺاهي وئي آهي. وارثن انصاف جو مطالبو ڪيو آهي. تفصيل موجب ڊي ايڇ او سانگهڙ ڊاڪٽر فاروق آرائين سانگهڙ ضلعي هيڊ ڪوارٽر اسپتال ۾ ڏهه مهينن جي ٻارڙي جي موت جو نوٽيس ورتو. واقعي جي جاچ لاءِ ٽن ڊاڪٽرن تي مشتمل انڪوائري ٽيم ٺاهي وئي آهي. ان کي هدايت ڪئي وئي آهي ته اصل حقيقتن جي جاچ ڪري 72 ڪلاڪن اندر رپورٽ پيش ڪئي وڃي. ٻئي طرف ٻارڙي جي موت کان پوءِ مائٽن لاش سانگهڙ پريس ڪلب جي سامهون رکي احتجاج ڪيو. مائٽن جو چوڻ آهي ته ٻه ڏينهن اڳ ٻارڙي جي صحت خراب ٿيڻ تي کيس ڊي ايڇ ڪيو اسپتال آندو ويو هو. پر انهن موجب ڊاڪٽرن جي علاج ۾ مبينا دير ۽ لاپرواهي سبب ٻارڙي جي جان بچي نه سگهي. وارثن مطالبو ڪيو ته واقعي جي شفاف ۽ غير جانبدار جاچ ڪرائي ذميوارن جو تعين ڪيو وڃي ۽ جيڪڏهن ڪنهن ڊاڪٽر يا عملي جي لاپرواهي ثابت ٿئي ٿي ته قانون ۽ کاتي جي ضابطن موجب ڪارروائي ڪئي وڃي. ڊي ايڇ او ڊاڪٽر فاروق آرائين پاران ٺاهيل انڪوائري ٽيم جي رپورٽ کان پوءِ واقعي جي اصل صورتحال سامهون اچڻ جي اميد آهي.