پاڪستان زرعي تحقيقاتي ڪائونسل ۽ سنڌ زرعي يونيورسٽي وچ ۾ زرعي تحقيق ۽ سهڪار وڌائڻ تي اتفاق

پاڪستان ايگريڪلچر ريسرچ ڪائونسل ۽ سنڌ زرعي يونيورسٽي وچ ۾ زرعي تحقيق، شاگردن جي عملي تربيت، گڏيل تحقيقي منصوبن ۽ ملڪ جي زرعي شعبي کي درپيش خدشن کي منهن ڏيڻ لاءِ سهڪار کي ھٿي ڏيڻ لاءِ اتفاق ڪيو آهي، جڏهن ته ٻنهي ادارن وچ ۾ موجود مفاهمتي يادداشت جي تجديد ۽ نوان گڏيل منصوبا شروع ڪرڻ تي پڻ غور ڪيو ويو، ان سلسلي ۾ پاڪستان ايگريڪلچر ريسرچ ڪائونسل جي ميمبر، پلانٽ سائنسز ڊويزن اسلام آباد، ڊاڪٽر سجاد علي رائو ۽ پاڪستان ايگريڪلچر ريسرچ ڪائونسل جي ڏاکڻي زرعي تحقيقي مرڪز ڪراچي جي ڊائريڪٽر جنرل پرويز احمد بلوچ سنڌ زرعي يونيورسٽي ٽنڊوڄام جي وائيس چانسلر انجنيئر پروفيسر ڊاڪٽر الطاف علي سيال سان ملاقات ڪئي. ڊاڪٽر سجاد علي رائو جي پلانٽ سائنسز ڊويزن جي ميمبر طور مقرري کانپوءِ سنڌ زرعي يونيورسٽي جو هي سندس پهريون تعارفي دورو هو، ملاقات ۾ ڊائريڪٽر اسٽوڊنٽس ٽيچرز انگيجمينٽ پروگرام پروفيسر ڊاڪٽر محمد اسماعيل ڪنڀر، ڊائريڪٽر آفيس آف ريسرچ، انوويشن اينڊ ڪمرشلائيزيشن ڊاڪٽر آسيہ اڪبر پنھور ۽ ٻيا لاڳاپيل عملدار پڻ شريڪ هئا، ملاقات دوران سنڌ زرعي يونيورسٽي ۽ پاڪستان ايگريڪلچر ريسرچ ڪائونسل وچ ۾ مفاهمتي يادداشت جي تجديد، زرعي رابطن واري پروگرام تحت منصوبن، گڏيل تحقيقي سرگرمين، شاگردن لاءِ انٽرن شپ ۽ عملي تربيت جا موقعا، زرعي شعبي جي ترقي ۾ يونيورسٽي جي ڪردار ۽ مستقبل ۾ گڏيل تحقيقي منصوبن سميت مختلف معاملن تي تفصيلي خيالن جي ڏي وٺ ڪئي وئي، شرڪت ڪندڙن ان ڳالهه تي زور ڏنو ته پاڪستان جو زرعي شعبو موسمياتي تبديلي، پاڻي جي کوٽ، فصلن جي گهٽ پيداوار، جيتن ۽ بيمارين سميت ڪيترن ئي چئلينجن کي منهن ڏئي رهيو آهي، جن کي منهن ڏيڻ لاءِ زرعي يونيورسٽين ۽ تحقيقي ادارن وچ ۾ مضبوط رابطن، جديد تحقيق ۽ گڏيل منصوبن کي هٿي وٺرائڻ وقت جي اهم ضرورت آهي، ان موقعي تي وائيس چانسلر انجنيئر پروفيسر ڊاڪٽر الطاف علي سيال چيو ته سنڌ زرعي يونيورسٽي ملڪ جي اهم زرعي تحقيقي ادارن سان رابطن کي وڌيڪ مضبوط بڻائڻ لاءِ پرعزم آهي. هن چيو ته گڏيل تحقيقي منصوبن، شاگردن جي عملي تربيت ۽ تحقيقي ادارن سان رابطن ذريعي شاگردن جي پيشه ورانه صلاحيتن ۾ واڌارو ٿيندو، جڏهن ته زرعي مسئلن جا سائنسي حل ڳولڻ ۽ تحقيق جا فائدا آبادگارن تائين پهچائڻ ۾ پڻ مدد ملندي، ڊاڪٽر سجاد علي رائو سنڌ زرعي يونيورسٽي جي زرعي تعليم، تحقيق ۽ ماهر افرادي قوت جي تياري ۾ ڪردار کي ساراهيندي چيو ته پاڪستان ايگريڪلچر ريسرچ ڪائونسل ۽ سنڌ زرعي يونيورسٽي وچ ۾ سهڪار کي وڌيڪ مؤثر بڻائي زرعي تحقيق ۽ تربيت جا فائدا سڌي ريت زرعي شعبي ۽ آبادگار برادري تائين پهچائي سگهجن ٿا، ان موقعي تي سنڌ زرعي يونيورسٽي جي ڊائريڪٽر ڪوالٽي انہانسمنٽ ڊاڪٽر سليم مسيح ڀٽي ميزبان جي حيثيت سان وائيس چانسلر ۽ پاڪستان ايگريڪلچر ريسرچ ڪائونسل جي وفد کي ٻنهي ادارن وچ ۾ موجود مفاهمتي معاهدي جي اهميت، ان جي دائري ۽ مستقبل ۾ گڏيل سهڪار جي امڪاني شعبن بابت تفصيلي بريفنگ ڏني، ملاقات جي پڄاڻي تي ٻنهي ادارن وچ ۾ مفاهمتي يادداشت جي تجديد لاءِ وڌيڪ صلاح مشورا جاري رکڻ تي اتفاق ڪيو ويو.