ماربل انڊسٽري بحران جو شڪار، حڪومت کان رليف پيڪيج جو مطالبو

ڪراچي پاڪستان جي ماربل ۽ اسٽون انڊسٽري سخت بحران جو شڪار آهي، ڳرا ٽيڪس، مهانگي بجلي ۽ وڌندڙ ڪاروباري خرچن سبب واپاري ۽ صنعتڪار پنهنجا ڪاروبار هلائڻ ۾ سخت ڏکيائين کي منهن ڏئي رهيا آهن بيروزگاري وڌڻ جو خدشو ظاهر ڪندي واپاري برادري حڪومت کان صنعت لاءِ خصوصي رليف پيڪيج ڏيڻ جو مطالبو ڪيو آهي.ان سلسلي ۾ آل پاڪستان ماربل انڊسٽري ايسوسيئيشن جي چيئرمين محمد بلال خان، سنڌ بلوچستان زون جي زونل وائيس چيئرمين راحت شاهه، اڳوڻي زونل وائيس چيئرمين جمشيد خان امازئي، ايف پي سي سي آءِ جي منرل ڪميٽي جي ميمبر اسدالله خان ۽ ٻين ملڪ ۾ ماربل ۽ اسٽون انڊسٽري کي درپيش سنگين مسئلن تي گهري ڳڻتي جو اظهار ڪندي حڪومت ۽ لاڳاپيل ادارن کان فوري ۽ عملي قدم کڻڻ جو مطالبو ڪيو آهي.ايسوسيئيشن موجب پاڪستان جي ماربل ۽ اسٽون انڊسٽري هن وقت سخت بحران کي منهن ڏئي رهي آهي. مائننگ جا پيچيده مسئلا، خام مال جي وڌندڙ قيمتون، ڳرا ٽيڪس، بجلي جا مهانگا اگهه، ڪاروباري خرچن ۾ اضافو ۽ مارڪيٽ ۾ مسلسل مندي صنعتڪارن ۽ واپارين لاءِ ڪاروبار جاري رکڻ انتهائي ڏکيو بڻائي ڇڏيو آهي.ايسوسيئيشن خاص طور تي ڪراچي جي منگھوپير ماربل انڊسٽريل ايريا ۾ بجلي چوري ۽ ڊگهي لوڊشيڊنگ کي صنعت لاءِ انتهائي ڳڻتي جو سبب قرار ڏيندي چيو آهي ته بجلي چوري جي مؤثر روڪٿام نه ٿيڻ ۽ مسلسل بجلي بند رهڻ سبب ڪارخانن جي پيداوار سخت متاثر ٿي رهي آهي. اهڙي صورتحال جو بار قانوني ۽ باقاعدگي سان بجلي جا بل ادا ڪندڙ صنعتي صارفين تي نه وڌو وڃي ايسوسيئيشن مطالبو ڪيو ته لاڳاپيل بجلي فراهم ڪندڙ ادارو ۽ قانون لاڳو ڪندڙ ادارا بجلي چوري ۾ ملوث عنصرن خلاف بنا فرق جي مؤثر ڪارروائي ڪن، جيئن منگھوپير جي صنعتي علائقي کي مسلسل لوڊشيڊنگ ۽ بجلي جي بندش مان ڇوٽڪارو ملي سگهي.ايسوسيئيشن موجب ڊگهي ۽ غيراعلانيه لوڊشيڊنگ سبب مشينري ڪلاڪن جا ڪلاڪ بند رهندي آهي، جنهن سان پيداواري عمل متاثر ٿيڻ سان گڏ ڪاروباري نقصانن ۾ پڻ مسلسل اضافو ٿي رهيو آهي. بروقت پيداوار نه ٿيڻ سبب صنعتڪار پنهنجا ملڪي ۽ عالمي آرڊر مقرر وقت اندر مڪمل نٿا ڪري سگهن، جنهن جو سڌو سنئون منفي اثر پاڪستان جي ماربل ۽ اسٽون جي برآمدات تي پئجي رهيو آهي. عالمي خريدارن جا آرڊر دير سان مڪمل ٿيڻ سبب پاڪستان جي ساک متاثر ٿيڻ ۽ قيمتي پرڏيهي ناڻو حاصل ڪرڻ ۾ پڻ نقصان جو خدشو آهي.آل پاڪستان ماربل انڊسٽري ايسوسيئيشن سنڌ بلوچستان زون چيو آهي ته ماربل انڊسٽري صرف هڪ ڪاروبار نه، پر هزارين خاندانن جي روزگار جو اهم ذريعو ۽ ملڪي معيشت جو هڪ اهم شعبو آهي. مهمند، بونير، مردان، خضدار، بلوچستان ۽ ملڪ جي ٻين ماربل ۽ پٿر پيدا ڪندڙ علائقن کان وٺي ڪراچي جي ڪارخانن ۽ مارڪيٽن تائين لکين ماڻهو سڌي ۽ اڻ سڌي طرح هن صنعت سان وابسته آهن.ايسوسيئيشن حڪومت کان مطالبو ڪيو ته ماربل ۽ اسٽون انڊسٽري لاءِ خصوصي رليف پيڪيج ڏنو وڃي، مائننگ جي طريقيڪار کي آسان، شفاف ۽ ڪاروبار دوست بڻايو وڃي، غيرضروري ٽيڪسن ۽ اضافي خرچن ۾ گهٽتائي ڪئي وڃي ۽ صنعتي شعبي لاءِ بجلي جي اگهن ۾ خصوصي رعايت ڏني وڃي ايسوسيئيشن جو چوڻ هو ته مهمند، بونير، مردان، خضدار، بلوچستان ۽ ٻين مائننگ وارن علائقن ۾ درپيش مسئلا فوري طور حل ڪيا وڃن، جديد مائننگ ۽ پروسيسنگ ٽيڪنالاجي لاءِ سيڙپڪاري جي حوصلا افزائي ڪئي وڃي ۽ صنعتڪارن کي آسان شرطن تي قرض ۽ ڪاروباري سهولتون فراهم ڪيون وڃن.ايسوسيئيشن حڪومت کان اهو پڻ مطالبو ڪيو ته پاڪستاني ماربل ۽ اسٽون جون برآمدات وڌائڻ لاءِ جامع ۽ مؤثر پاليسي جوڙي وڃي ۽ حڪومت، مائن مالڪن، صنعتڪارن، واپارين ۽ لاڳاپيل ادارن کي هڪ پليٽ فارم تي گڏ ڪري هن اهم صنعت جي بحالي ۽ ترقي لاءِ گڏيل حڪمت عملي اختيار ڪئي وڃي.ايسوسيئيشن چيو ته مهمند هجي، بونير، مردان، خضدار ۽ بلوچستان هجي يا ڪراچي جو منگھوپير ماربل انڊسٽريل ايريا، هر علائقي جا مسئلا فوري ۽ مستقل بنيادن تي حل ڪرڻ ضروري آهي. ماربل انڊسٽري کي سهارو ڏيڻ صرف صنعتڪارن جي مدد نه، پر روزگار جي تحفظ، ڪاروباري سرگرمين جي واڌ، برآمدات ۾ اضافي ۽ ملڪي معيشت کي مضبوط ڪرڻ جي برابر آهي.آل پاڪستان ماربل انڊسٽري ايسوسيئيشن حڪومت ۽ سمورن لاڳاپيل ادارن کان مطالبو ڪيو آهي ته هن اهم صنعت کي وڌيڪ زوال کان بچائڻ لاءِ فوري، سنجيده ۽ عملي قدم کنيا وڃن.