ٽنڊوڄام ويجهو ڦٽين جي چوري، ڳوٺاڻن چئن مبينا چورن کي پڪڙي پوليس حوالي ڪري ڇڏيو

ٽنڊوڄام(رپورٽ محبوب حسين بوزدار ) ٽنڊوڄام  ويجهو ڦٽين جي چوري، ڳوٺاڻن چئن مبينا چورن کي پڪڙي پوليس حوالي ڪري ڇڏيو. ٽنڊوڄام خبر موجب ٽنڊوڄام ويجهو ڳوٺ غازي خان سيال جي رهواسين ڦٽين جي فصل مان چوري ڪرڻ جي مبينا ڪوشش ڪندڙ چئن ڄڻن کي پڪڙي ورتو، جن کي ٽنڊوڄام پوليس حوالي ڪيو ويو. گرفتار ڪيلن جي سڃاڻپ خادم چانڊيو، غفار منير ۽ عظيم چانڊيو طور ٻڌائي وئي آهي، جڏهن ته پوليس موجب سندن تعلق ڳوٺ بهادر چانڊيو سان ٻڌايو پيو وڃي.ڳوٺاڻن ميڊيا سان ڳالهائيندي چيو ته علائقي ۾ فصلن جي چوري سبب هاري سخت پريشان آهن. سندن چوڻ هو ته هاري ڏينهن رات محنت ڪري ٻج، ڀاڻ، پاڻي ۽ ٻين خرچن سان فصل تيار ڪن ٿا، پر فصل تيار ٿيڻ کانپوءِ مبينا چور ان کي پنهنجي ملڪيت سمجهي کڻي وڃن ٿا.ڳوٺاڻن ٽنڊوڄام پوليس کان مطالبو ڪيو ته گرفتار ڪيل مبينا جوابدارن خلاف قانون موجب ڪارروائي ڪئي وڃي ۽ علائقي ۾ فصلن جي چوري روڪڻ لاءِ پوليس گشت وڌايو وڃي.