بدين ۾ لائيو اسٽاڪ کاتي جي فيلڊ عملي ۾ 13 موٽر سائيڪلون ورهايون ويون

بدين (رپورٽ محفوظ شاھ) لائيو اسٽاڪ ۽ اينيمل هسبينڊري کاتي بدين پاران ٻهراڙي وارن علائقن ۾ جانورن جي صحت جون سهولتون يونين ڪائونسل جي سطح تائين پهچائڻ واري منصوبي ”لائيو اسٽاڪ موٽر سائيڪل اينيمل هيلٿ سروس فار رورل ايرياز ايٽ يونين ڪائونسل ليول، لوئر سنڌ“ تحت فيلڊ عملي ۾ 13 موٽر سائيڪلون ورهائڻ ۽ 2026ع جي مون سون سيزن دوران بهترين خدمتون سرانجام ڏيندڙ آفيسرن ۽ عملي ۾ تعريفي شيلڊون ورهائڻ جي تقريب جيم خانه بدين ۾ منعقد ڪئي وئي تقريب کي خطاب ڪندي ڊائريڪٽر جنرل لائيو اسٽاڪ سنڌ ڊاڪٽر حزب الله ڀٽو، ڊائريڪٽر اينيمل هسبينڊري سنڌ ڊاڪٽر ارشد خانزاده، ڊزيز انويسٽيگيشن آفيسر سنڌ ڊاڪٽر عبدالمنان کوکر ۽ ڊپٽي ڊائريڪٽر لائيو اسٽاڪ/اينيمل هسبينڊري بدين ڊاڪٽر دودو چانڊيو چيو ته ٻهراڙي وارن علائقن ۾ مالوند ماڻهن کي جانورن جي علاج ۽ صحت بابت سهولتون سندن ويجهو فراهم ڪرڻ وقت جي اهم ضرورت آهي، جنهن لاءِ فيلڊ عملي کي جديد سهولتون ۽ ضروري وسيلا فراهم ڪرڻ سان گڏ سندن ڪارڪردگي کي وڌيڪ اثرائتو بڻائڻ ضروري آهي هنن چيو ته موٽر سائيڪلون ملڻ سان فيلڊ عملي جي آمدرفت ۾ آساني پيدا ٿيندي ۽ هو ڏورانهن ڳوٺن توڙي يونين ڪائونسلن تائين گهٽ وقت ۾ پهچي سگهندا. ان سان جانورن جي بيمارين جي بروقت سڃاڻپ، علاج، حفاظتي ويڪسين، بيمارين جي پکڙجڻ کي روڪڻ ۽ مالوند ماڻهن کي جانورن جي صحت بابت ضروري رهنمائي فراهم ڪرڻ واري عمل ۾ بهتري اچڻ جي اميد آهي هنن وڌيڪ چيو ته لائيو اسٽاڪ کاتو ٻهراڙي جي معيشت ۽ مالوند ماڻهن جي روزگار سان سڌو سنئون لاڳاپيل آهي، ڇاڪاڻ ته جانورن جي صحت جو دارومدار بروقت علاج ۽ بيمارين کان بچاءَ تي آهي. فيلڊ عملي جي پهچ ۾ بهتري اچڻ سان جانورن جي بيمارين سبب ٿيندڙ نقصان گهٽائڻ، کير ۽ گوشت جي پيداوار کي برقرار رکڻ ۽ مالوند ماڻهن کي سندن علائقن ۾ بهتر جانورن جي صحت جون خدمتون فراهم ڪرڻ ۾ مدد ملندي تقريب دوران 2026ع جي مون سون سيزن ۾ پنهنجون ذميواريون بهتر نموني سرانجام ڏيندڙ لائيو اسٽاڪ کاتي جي آفيسرن ۽ عملي جي خدمتن کي ساراهيندي کين تعريفي شيلڊون پڻ پيش ڪيون ويون. ان موقعي تي ڳالهائيندڙن چيو ته قدرتي آفتن ۽ مون سون دوران فيلڊ عملي جو ڪردار انتهائي اهم هوندو آهي، ڇاڪاڻ ته اهڙين حالتن ۾ جانورن جي سار سنڀال، بيمارين کان بچاءَ ۽ متاثر علائقن ۾ بروقت سهولتون پهچائڻ لاءِ عملي کي وڌيڪ محنت ۽ ذميواري سان ڪم ڪرڻو پوندو آهي هنن اميد ظاهر ڪئي ته موٽر سائيڪلون ملڻ سان فيلڊ عملي جي ڪارڪردگي ۾ وڌيڪ بهتري ايندي ۽ لائيو اسٽاڪ کاتي جون خدمتون ٻهراڙي جي مالوند ماڻهن تائين وڌيڪ تيزي ۽ اثرائتي انداز ۾ پهچنديون. هنن عملي تي زور ڏنو ته هو پنهنجي ذميوارين کي ايمانداري ۽ لگن سان نڀائيندي جانورن جي صحت جي تحفظ ۽ مالوند ماڻهن جي مسئلن جي حل لاءِ پنهنجو ڀرپور ڪردار ادا ڪن.