کوٹ غلام محمد (رپورٹ): کوٹ غلام محمد میں سجاڳ ٻار تحریک اور قومی عوامی تحریک کی جانب سے “متحد سندھ، مضبوط سندھ” مہم کے سلسلے میں عوامی پریس کلب کے سامنے احتجاجی مظاہرہ کیا گیا۔
مظاہرے کی قیادت قومی عوامی تحریک کے ضلعی رہنما مقصود احمد بھرگڑی نے کی، جبکہ سجاڳ ٻار تحریک کے راجیش کولہی، اجیت ساگر، سریش کمار، ہادی بخش بھرگڑی، کامریڈ رازو کولہی سمیت بڑی تعداد میں نوجوان کارکنوں، طلبہ اور دیگر شرکاء نے شرکت کی۔
اس موقع پر رہنماؤں نے میڈیا سے گفتگو کرتے ہوئے کہا کہ قومی عوامی تحریک کے سربراہ ایاز لطیف پلیجو کی ہدایت پر پورے سندھ میں 10 جون سے 31 جولائی تک “متحد سندھ، مضبوط سندھ” مہم جاری ہے، جس کے تحت مختلف شہروں میں آگاہی مہم اور احتجاجی پروگرام منعقد کیے جا رہے ہیں۔
رہنماؤں کا کہنا تھا کہ سندھ کے معدنی وسائل کی مبینہ لوٹ مار، مجوزہ 28ویں آئینی ترمیم، منشیات کے بڑھتے ہوئے استعمال سے نوجوان نسل کی تباہی، زراعت کو درپیش مسائل، خواتین کے قتل، پانی کی مصنوعی قلت، سندھ کے وسائل پر قبضے، انتہا پسندی کی آڑ میں کراچی سمیت سندھ کے مالی، آبی اور دیگر وسائل پر کنٹرول، اور نوجوانوں، طلبہ، کسانوں، مزدوروں، خواتین، اقلیتوں، تاجروں، سرکاری ملازمین اور آبادگاروں کو درپیش مسائل کے خلاف یہ پرامن احتجاج کیا گیا۔
انہوں نے مطالبہ کیا کہ سندھ کے وسائل اور عوام کے حقوق کا تحفظ یقینی بنایا جائے اور عوام کو درپیش مسائل کے حل کے لیے مؤثر اقدامات کیے جائیں۔
