سنڌ جي ٻين شهرن جيان لاڙڪاڻي ۾ به عيدالاضحيٰ مذهبي جوش ۽ جذبي سان ملهائي وئي. عيدالاضحيٰ جي موقعي تي شهر جي جناح باغ، ذوالفقار باغ، ٽئنڪ چوڪ، درگاهه رحمت پور، لاهوري محلا، سچل ڪالوني، ايوب ڪالوني، ڪوثر مل، غالب نگر، ڀينس ڪالوني، نظر محلا سميت ضلعي جي ننڍن وڏن شهرن توڙي ڳوٺن ۾ عيد جا وڏا اجتماع ٿيا جتي وڏي انگ ۾ شهرين شرڪت ڪري عيد نماز ادا ڪري ملڪي بقا، سلامتي، خوشحالي توڙي پاڪ فوج جي لاءِ خصوصي دعائون گهريون. عيد جي موقعي تي ضلعي پوليس طرفان ايس ايس پي احمد فيصل چوڌري جي هدايتن تي سمورن عيدگاهن، امام بارگاهن ۽ عيد اجتماعن جي سيڪيورٽي انتهائي سخت ڪندي وڏي تعداد ۾ پوليس اهلڪارن کي مقرر ڪيو ويو هو. شهرين طرفان عيد نماز جي ادائيگي بعد سنتي ابراهيمي جو فرض ادا ڪندي مختلف جانورن جي قرباني ڪئي ۽ جانورن جو گوشت پاڙيسرين، مٽ مائٽن ۽ دوستن ۾ ورهايو.
لاڙڪاڻو(بيورو رپورٽ) لاڙڪاڻي شهر جي نظر محلا ۾ نوجوان بجلي جي ڪرنٽ لڳڻ سبب فوت ٿي ويو عيد جون خوشيون ماتم ۾ تبديل ٿي ويون. ان سلسلي ۾ لاڙڪاڻي شهر جي نظر محلا واسي 24 ورهين جو نالي مٺو پٽ عبدالمجيد عمراڻي بجلي جي ڪرنٽ لڳڻ سبب بيهوش ٿي ويو جنهن کي وارثن ڳڻتي جوڳي حالت ۾ کڻائي چانڊڪا اسپتال جي ايمرجنسي وارڊ منتقل ڪيو ويو جتي نوجوان دم ڏئي ڇڏيو. ان حوالي سان نوجوان جي وارثن جو چوڻ هو ته نالي مٺو گهر اندر پاڻي واري موٽر هلائي رهيو هو جيڪو ڪرنٽ لڳڻ سبب بيهوش ٿي ويو جنھن کي اسپتال منتقل ڪيو جتي هو فوت ٿي ويو آهي. ٻئي طرف اسپتال انتظاميه ضروري ڪارروائي بعد نوجوان جو لاش وارثن حوالي ڪيو ويو جنھن جو لاش گهر پهچڻ تي ڪهرام مچي ويو عيد جون خوشيون ماتم تبديل ٿي ويون.
لاڙڪاڻو(بيورو رپورٽ) شهيد مير مرتضيٰ ڀٽو جي فرزند جونيئر ذوالفقار علي ڀٽو لاڙڪاڻو شيخ زيد وومين اسپتال ۽ چانڊڪا ٻارن جي اسپتال جو دورو جتي هن ايڇ آءِ وي ۾ مبتلا مريضن جي عيادت ڪئي. دوري دوران جونيئر ذوالفقار علي ڀٽو ايڇ آءِ وي مريضن بابت ڊاڪٽرن سان صلاح مشورا ڪيا. ان موقعي تي جونيئر ذوالفقار علي ڀٽو ايڇ آءِ وي مريضن بابت ڊاڪٽرن کي بهتر علاج فراهم ڪرڻ لاءِ ڪوششون وٺڻ جون هدايتون پڻ ڏنيون.
لاڙڪاڻو(بيورو رپورٽ) مديجي ۾ مبينا طور گهرو اڻبڻت تان 30 سالن جي پورهيت نوجوان محمد هاشم پٽ سلطان بروهي ڦاهو کائي خودڪشي جي ڪوشش ڪئي جنهن کي وارثن کڻائي چانڊڪا اسپتال جي ايمرجنسي وارڊ منتقل ڪيو جتي ڊاڪٽرن سندس حالت ڳڻتي جوڳي ٻڌائييندي کيس طبي امداد ڏني. ان موقعي تي خودڪشي جي ڪوشش ڪندڙ پورهيت نوجوان جي وارثن جو چوڻ آهي ته اسان جي نوجوان گهرو وزير تان پاڻ کي گهر جي ڪمري ۾ بند ڪري ڦاهو کائي خودڪشي جي ڪوشش ڪئي جنهن کي چانڊڪا اسپتال جي ايمرجنسي وارڊ منتقل ڪيو جتي ڊاڪٽرن سندس حالت ڳڻتي جوڳي ٻڌائي آهي.
لاڙڪاڻو(بيورو رپورٽ) سنڌ جي وڏي وزير جي خاص معاون ۽ لاڙڪاڻو چيمبر آف ڪامرس اينڊ انڊسٽري جي صدر خيرمحمد شيخ، سنڌ بئنڪ جي ڊپٽي سي اي او سيد اسد علي شاهه سان چيمبر آفيس ۾ گڏجاڻي ٿي جنهن ۾ ايگزيڪيوٽو ڪاميٽي ميمبرن جي نئين ميمبرشپ جي حوالي سان اجلاس ٿيو. گڏجاڻي ۾ صدر خير محمد شيخ سنڌ بيئنڪ جي ڊپٽي سي اي او سيد اسد علي شاهه کي ڀليڪار ڪندي سندس والد مرحوم جسٽس سيد ديدار حسين شاهه کي صدر پاڪستان جي طرفان ستاره امتياز ملڻ تي خراج تحسين پيش ڪئي. گڏجاڻي ۾ صدر جي هدايت موجب نئين ميمبرشپ جي حوالي سان ڳالهه ٻولهه ڪئي وئي جنهن ۾ 12 نوان ميمبرشپ فارم جا ڪيس ايگزيڪوٽو ڪاميٽي ميمبرن آڏو پيش ڪيا ويا جن جي پڻ منظوري ورتي وئي ۽ نئين ميمبرشپ پڻ جاري آهي. بعد ۾ صدر اڳوڻي صدور، ايگزيڪوٽو ڪاميٽي ميمبرن جي مان ۾ عيد ملن جي گڏجاڻي ڪئي جنهن ۾ هڪٻئي کي عيد جي مبارڪباد پيش ڪئي وئي. گڏجاڻي ۾ سينئر نائب صدر، هريش لال، نائب صدر، جمال مصطفى شيخ، ۽ سابقه صدور محمد علي شيخ، احمد علي، بشير احمد ايم پريل، مسعود احمد، آصف رضا، نول راءِ، منور نديم، ايگزيڪوٽو ڪاميٽي ميمبرن رسول بخش شيخ، شمشاد احمد، عبدالرزاق شيخ، عطا حسين کچي، عبداللطيف ۽ علي رضا کوکر، عبدالرزاق بروهي، جاويد مراد، وسيم احمد شيخ ۽ ٻين ميمبرن شرڪت ڪئي.
لاڙڪاڻو(بيورو رپورٽ) سنڌ مان اغوا ٿيل معصوم ٻارڙن سنگرار روھڙي جي پريا ڪماري، ميھڙ جي اجالا سولنگي، ٺل جي فيضلا سرڪي، نئون ديرو جو ساحل ڪوريجو، جيڪب آباد جي نويد لاشاري جي بازيابي لاءِ لاڙڪاڻو ۾ ڊسٽرڪٽ بار جي سڏ تي وڪيل اڳواڻن ۽ سياسي سماجي تنظيمن جي اڳواڻن جناح چونڪ تي احتجاجي مظاهرو ڪري ڌرڻو هڻي نعريبازي ڪئي. ان مظاهرين ڊسٽرڪٽ بار جي صدر وڪيل جاويد بليدي، اڳوڻي صدر وڪيل رفيق احمد ابڙو، پي ٽي آءِ اڳواڻ وڪيل رئوف ڪورائي، عوامي تحريڪ جي مرڪزي جنرل سيڪريٽري ايڊووڪيٽ ساجد حسين مھيسر، سنڌي شاگرد تحريڪ جي مرڪزي آرگنائيزر اعتزاز گائينچو، عوامي تحريڪ ضلعي لاڙڪاڻي جي صدر ڪامريڊ علي حسن وڪو، عوامي تحريڪ ضلعي لاڙڪاڻي جي اڳواڻن محمد خان چانڊيو، مقبول راھوجو، پيپلز پارٽي شهيد ڀٽو جي اڳواڻن لياقت عمراڻي، غلام رسول عمراڻي ۽ ٻين مظاهري کي خطاب ڪندي چيو ته سنڌ ۾ معصوم ٻارڙن جي اغوا جون وارڌاتون وڌنديون پيون وڃن ۽ سالن وٺي سنڌ جون اغوا ٿيل نياڻين کي هن محل تائين بازياب نه ڪرايو وڃي جنهن سبب سندن جا وارث پريشان آهن ته ٻئي طرف سنڌ جو وزير اعلي چوي پيو ته اسين شرمسار آهيون ،جڏهن ته پٺاڻن جي نياڻي اغوا ٿي ته انهن پنهجي اغوا ٿيل نياڻي جي بازيابي لاءِ ڪوئيٽا سميت ٻين علائقن مان سنڌ جو رخ ڪيو ته سنڌ پوليس تحرڪ ۾ اچي وئي ۽ اها نياڻي ڪلاڪن اندر بازياب ٿي وئي ته سنڌ جون نياڻيون ڇو نه پيو بازياب ٿين. هنن مطالبو ڪيو ته سنڌ مان اغوا ٿيل نياڻين کي بازياب ڪرائي وارثن سان انصاف ڪيو وڃي ٻي صورت ۾ احتجاجي تحريڪ ھلائي ويندي.
لاڙڪاڻو(بيورو رپورٽ) لاڙڪاڻي شهر جي آريجا روڊ واري علائقي جي رهواسي پيرسن بااثرن جي مبينا ناجائزين خلاف پريس ڪلب اڳيان احتجاج ڪيو. ان موقعي تي پيرسن حسين بخش ڪلهوڙو دانهيندي چيو ته ٽي مهينا اڳ مان مگسي ذات جي همراهه کان مسواڙ تي جڳهه ورتي جنهن ۾ مان رهائش اختيار ڪري ويٺو آهيان. هن الزام لڳايو ته پاڙيسري بااثر ڪوٽو ڪورڪاڻي مون کي جڳهه مان لڏائي ڄاڻايل جڳهه مسواڙ تي وٺڻ چاهي ٿو جنهن ڪالهه مون مٿان غلط الزام لڳائي پنهنجي پٽن علي بخش ڪورڪاڻي ۽ ٻين سان گڏجي گهر ۾ گهڙي مون کي تشدد جو نشانو بڻائي موتمار ڌمڪيون ڏنيون اهڙي دانهن کڻي وليد ٿاڻي تي مقرر منشي طفيل احمد عمراڻي ۽ ٻين کي ڏني جن تدارڪ ڪرڻ بجاءِ بااثرن جي وانگار وهندي منهنجي شڪايت درج نه ڪئي ۽ نه ئي بااثرن خلاف ڪاروائي ڪئي جنهن ڪري بااثرن مان مون کي جاني ۽ ماني نقصان جو خدشو آهي. منهنجي لاڙڪاڻي جي ڊي آءِ جي ۽ ايس ايس پي کي اپيل آهي ته بااثرن خلاف ڪاروائي ڪري تحفظ فراهم ڪيو وڃي
