اداڪارا ۽ اڳوڻي ڪرڪيٽر سليم يوسف جي نياڻي ايمن سليم سياست ۾ پير پائي ڇڏيو آهي ۽ پاڪستان پيپلز پارٽيءَ ۾ شموليت اختيار ڪري ورتي آهي. ان حوالي سان ايمن سليم جي هڪ وڊيو پڻ سماجي رابطن وارين ماڳن تي پکڙجي وئي آهي، جنهن ۾ هوءَ هڪ تقريب دوران پيپلز پارٽيءَ ۾ شامل ٿيڻ جو اعلان ڪندي نظر اچي ٿي.
ايمن سليم چيو ته هوءَ ننڍپڻ کان ئي شهيد محترمه بينظير ڀٽو جي وڏي مداح رهي آهي. سندس چوڻ هو ته سندس خيال ۾ هر اها ڇوڪري شهيد بينظير ڀٽو کان متاثر آهي، جنهن محترمه جي زندگيءَ کي ويجهڙائيءَ کان ڏٺو آهي.
هن چيو ته سندس لاءِ اها خوشي ۽ فخر جي ڳالهه آهي ته هوءَ پاڪستان پيپلز پارٽيءَ جو حصو بڻجي رهي آهي. هن وڌيڪ چيو ته ذاتي طور سندس لاءِ اهو رڳو سياسي فيصلو ناهي، پر اهو هڪ واعدو آهي، جيڪو هوءَ پنهنجي ملڪ ۽ ملڪ جي ماڻهن سان ڪرڻ چاهي ٿي.
اداڪارا جو چوڻ هو ته هوءَ هن پليٽفارم وسيلي نيڪ نيتيءَ سان ۽ دل جي گهراين سان پنهنجي ملڪ لاءِ ڪم ڪندي.
