بدين صوبائي وزير سيد رياض حسين شاهه شيرازي جو لاڙ جي لعل درگاهه سيد سمن سرڪار جي 95هين عرس مبارڪ جو افتتاح ڪيو

بدين( ڊ ر محفوظ شاه )بدين سنڌ جي اوقاف، مذهبي معاملن، زڪوات ۽ عشر واري صوبائي وزير سيد رياض حسين شاهه شيرازي گلاب لغاري ويجهو سنڌ جي تاريخي ماڳ اگهم ڪوٽ پهچي معصومه سنڌ بي بي ماهم بنت امام موسىٰ ڪاظم عليه السلام جي روضي مبارڪ تي چادر چاڙهي، جاري تعميراتي ڪم جو تفصيلي جائزو ورتو ۽ لاڳاپيل عملدارن کي هدايت ڪئي ته تعميراتي ڪم ۾ ڪنهن به قسم جي ڪوتاهي يا غفلت هرگز برداشت نه ڪئي ويندي، جڏهن ته روضي جي تعمير هر صورت ۾ جون 2027ع تائين مڪمل ڪئي وڃي ان موقعي تي سيڪريٽري اوقاف سنڌ آغا فاخر حسين ۽ چيف ايڊمنسٽريٽر اوقاف سنڌ مختيار علي ابڙو پڻ صوبائي وزير سان گڏ هئا. صوبائي وزير کي جاري ترقياتي ڪمن بابت بريفنگ ڏني وئي ۽ هن ڪم جي معيار، رفتار ۽ مقرر مدي اندر تڪميل کي يقيني بڻائڻ تي زور ڏنو مذهبي معاملن واري ڪميٽي ۽ اوقاف کاتي پاران منعقد ڪيل تقريب کي خطاب ڪندي ۽ ميڊيا سان ڳالهائيندي صوبائي وزير سيد رياض حسين شاهه شيرازي چيو ته اهل بيت ۽ امامن جون قربانيون اسلامي تاريخ جو اهم باب آهن. بي بي ماهم بنت امام موسىٰ ڪاظم عليه السلام جي روضي مبارڪ تي سڄي دنيا مان لکين عقيدتمند ۽ زائرين حاضري ڀرڻ لاءِ اچن ٿا، تنهنڪري کين بهترين سهولتون فراهم ڪرڻ اوقاف کاتي ۽ سنڌ حڪومت جي اولين ترجيحن ۾ شامل آهي هن چيو ته سنڌ جي ٻين بزرگن ۽ اوليائن جي درگاهن تي به زائرين لاءِ سهولتن کي بهتر بڻائڻ لاءِ قدم کنيا پيا وڃن. بي بي ماهم عليه السلام جي روضي جي تعمير سان گڏ زائرين جي رهائش لاءِ مسافر خانو، واش رومز، آر او پلانٽ ۽ درگاهه ڏانهن ويندڙ سمورن رستن جي تعمير ۽ بهتري کي پڻ يقيني بڻايو ويندو. هن وڌيڪ چيو ته علائقي جي چونڊيل نمائندن، ايم پي ايز جي مشاورت سان ترقياتي اسڪيمن کي مڪمل ڪرڻ لاءِ ضروري قدم کنيا ويندا، جيئن ملڪ جي مختلف حصن مان ايندڙ زائرين کي سهولتون ميسر ٿي سگهن.بعد ۾ صوبائي وزير سيد رياض حسين شاهه شيرازي بدين ويجهو لاڙ جي مشهور روحاني ۽ تاريخي درگاهه سيد سمن سرڪار تي حاضري ڀري، مزار تي چادر چاڙهي 95هين عرس مبارڪ جو باقاعده افتتاح ڪيو. ان موقعي تي هن فاتح خواني ڪئي ۽ ملڪ ۽ قوم جي سلامتي، خوشحالي، امن امان ۽ ترقي لاءِ خصوصي دعا گهري صوبائي وزير چيو ته سنڌ جي صوفي بزرگن جي تعليمات محبت، رواداري، امن، انسانيت ۽ ڀائيچاري جو درس ڏين ٿيون. درگاهن تي منعقد ٿيندڙ عرس مبارڪ سنڌ جي شاندار صوفي روايتن ۽ روحاني ورثي کي زنده رکڻ سان گڏ ماڻهن ۾ محبت ۽ اتحاد کي هٿي ڏيڻ جو اهم ذريعو آهن هن چيو ته درگاهه سيد سمن سرڪار تي هر سال وڏي انگ ۾ عقيدتمند حاضري ڀرين ٿا، جڏهن ته اهڙيون روحاني تقريبون سنڌ جي ثقافتي ۽ مذهبي سڃاڻپ کي وڌيڪ اجاگر ڪن ٿيون.