حيدرآباد : پاڪستان جي 79هين جشنِ آزادي جي موقعي تي پبلڪ اسڪول حيدرآباد جي انتظاميا پاران قومي جذبي، حب الوطني ۽ شاندار ادبي، ثقافتي ۽ راندين جي روايتن سان ڀرپور مختلف پروقار تقريبن جو اهتمام ڪيو ويو، جن ۾ شاگردن، استادن ۽ شهر جي معزز شخصيتن وڏي انگ ۾ شرڪت ڪري قومي جذبي جو ڀرپور اظهار ڪيو.
جشنِ آزادي جي سلسلي ۾ پبلڪ اسڪول حيدرآباد پاران هڪ شاندار آزادي ريلي پڻ ڪڍي وئي، جيڪا دائود مارٽ کان شروع ٿي پبلڪ اسڪول اسٽيڊيم پهتي. ريلي جي اڳواڻي اسڪول جي پرنسپال اقبال ميمڻ، ميڊم فريده ۽ اسپورٽس آفيسر ريحان شيخ ڪئي.
ريلي ۾ شريڪ شاگردن ۽ استادن هٿن ۾ قومي جهنڊا کڻي پاڪستان سان پنهنجي محبت ۽ عقيدت جو اظهار ڪيو. ريلي دوران قومي نعرا ۽ ملي نغما فضا کي حب الوطني جي جذبي سان سرشار ڪري رهيا هئا.
بعد ۾ پبلڪ اسڪول جي اسٽيڊيم ۽ اسپورٽس ڪمپليڪس ۾ مختلف راندين جا مقابلا، ڊوڙون ۽ ثقافتي پروگرام منعقد ڪيا ويا، جن ۾ شاگردن وڏي جوش ۽ جذبي سان حصو ورتو.
جونيئر سيڪشن جي معصوم ٻارن پنهنجي دلڪش انداز ۾ مختلف ٽيبلوز ۽ خوبصورت ملي نغما پيش ڪري حاضرين کان ڀرپور داد ۽ واکاڻ حاصل ڪئي. ٻارن جي فني صلاحيتن ۽ حب الوطني سان ڀرپور پيشڪش تقريب کي وڌيڪ يادگار بڻائي ڇڏيو.
تقريب جي نظامت محترمه صنم ريحان نهايت خوبصورتي، رواني ۽ فصاحت سان انجام ڏني، جڏهن ته اسپورٽس آفيسر ريحان شيخ راندين جي سمورن مقابلن ۽ انتظامن کي بهترين نموني منظم ڪيو.
جشنِ آزادي جي ٻئي ڏينهن صبح جو سينئر بوائز سيڪشن ۾ پرچم ڪشائي جي پروقار تقريب منعقد ڪئي وئي، جنهن ۾ اسڪول جي پرنسپال اقبال ميمڻ مهمانِ خاص طور شرڪت ڪئي ۽ قومي جهنڊو ڦڙڪائي تقريب جو باقاعده افتتاح ڪيو.
ان موقعي تي پرنسپال اقبال ميمڻ قيامِ پاڪستان، آزاديءَ جي جدوجهد ۽ وطن جي حصول لاءِ ڏنل عظيم جاني ۽ مالي قربانين تي اثرائتو خطاب ڪندي چيو ته پاڪستان اسان جي وڏڙن جي بي لوث جدوجهد، لازوال قربانين ۽ بي مثال عزم جو ثمر آهي. ملڪ جي حفاظت، ترقي، خوشحالي ۽ استحڪام لاءِ پنهنجو ڪردار ادا ڪرڻ اسان سڀني جي قومي، تعليمي ۽ اخلاقي ذميواري آهي.
جشنِ آزادي جي تقريب کي ڪامياب بڻائڻ ۾ اسڪول انتظاميا، سينيئر استادن ۽ مختلف شعبن سان تعلق رکندڙ عملي جو نمايان ڪردار رهيو. تقريب ۾ پرنسپال اقبال ميمڻ، وائيس پرنسپال فضل الدين ميمڻ، وائيس پرنسپال فوزيه صديقي، مس مريم، سينيئر ايڇ او ڊيز غلام محمد قريشي، اصغر ۽ اياز شاهه سميت ٻين استادن ۽ عملي ڀرپور شرڪت ڪئي.
تقريب جي انتظام، ترتيب ۽ نظم و ضبط برقرار رکڻ ۾ فرحان لوڌي ۽ سندس ساٿين جون ڪوششون پڻ ساراهه جوڳيون رهيون، جن جي بهترين انتظامي صلاحيتن تقريب جي وقار ۽ خوبصورتي ۾ وڌيڪ اضافو ڪيو.
تقريب جي پڄاڻيءَ تي مختلف راندين ۽ ٻين مقابلن ۾ نمايان ڪارڪردگي ڏيکاريندڙ شاگردن جي حوصلا افزائي لاءِ کين سرٽيفڪيٽ ۽ شيلڊون ڏنيون ويون. بعد ۾ حاضرين، استادن ۽ مهمانن لاءِ پرتڪلف ناشتي جو پڻ اهتمام ڪيو ويو.
پبلڪ اسڪول حيدرآباد ۾ منعقد ڪيل جشنِ آزادي جون هي تقريبون قومي يڪجهتي، حب الوطني، تعليمي ۽ ثقافتي شعور کي اجاگر ڪرڻ سان گڏ شاگردن ۾ ملڪ سان محبت ۽ قومي ذميوارين جو احساس وڌيڪ مضبوط ڪرڻ جي عزم سان پڄاڻيءَ تي پهتيون.
